Бүгүн Дьокуускайга уонна киин оройуоннарга өрөбүл күн

Атырдьах ыйын 13 күнэ хойуу буруонан сибээстээн  өрөбүл күнүнэн биллэриллиннэ. Өрөспүүбүлүкэ 11 оройуоннарыгар уонна куораттарыгар ойуур баһаара тохтообот. 
Ол туһунан ойуур баһаардарын туһунан брифиҥҥэ регион баһылыга Айсен Николаев иһитиннэрдэ.
«Баһаардар буруолара дьон доруобуйатыгар буортулаах, атырдьах ыйын 13 күнүгэр 11 муниципальнай тэриллиилэргэ, ол иһигэр Дьокуускайга, Жатайга уонна киин оройуоннарга өрөбүл күнүнэн биллэрэр туһунан ыйаахха илии баттаатым», – диэтэ кини.
Баһылык суһал (экстреннай) сулууспалартан ураты тэрилтэлэр өрүүллэр диэн чуолкайдаан эттэ. Кини олохтоохтору өрөбүл күҥҥүтүн дьиэҕэ атаарыҥ, буруоҕа тахсымаҥ диэн көрдөстө. 
«Өрөбүл күнү дьиэҕитигэр атаарыҥ, күнү-дьылы билгэлээччилэр этэллэринэн, буруо күн иккис аҥаарыгар биирдэ арыый буолар», – диэн бэлиэтээтэ Айсен Николаев.