Бүгүн Дьокуускай Үөрэҕин управлениета нэһилиэнньэ ыйытыыларыгар хоруйдуур

Бүгүн, ол эбэтэр атырдьах ыйын 17 күнүгэр, киэһэ 18.00 чаастан “Россия 24” телеханаалга Дьокуускай куорат дьаһалтатын үөрэххэ управлениетын начаалынньыга Алексей Семенов “Прямой эфир с городом” биэриигэ кыттыаҕа, киин куорат олохтоохторун ыйытыыларыгар хоруйдуоҕа.

Алексей Климентьевич саҥа үөрэх дьылыгар бэлэмнэнии, оскуолаларга, оҕо уһуйааннарыгар коронавирус дьаҥа тарҕамматын туһугар сэрэтэр үлэ хайдах буолуохтааҕын туһунан сиһилии кэпсиэҕэ. Быһа эфиргэ маҥнайгы кылааска суруйтарыы, алын сүһүөх кылаас оҕолорун итии аһынан хааччыйыы, о.д.а. тыын боппуруостар таарыллыахтара.

Күндү куорат олохтоохторо! Быһа эфир кэмигэр бэйэҕит ыйытыыларгытын, баҕа санааларгытын 32-02-02 төл. эрийэн биэриэххитин сөп. Эфиргэ тахсыбатах ыйытыылар биэрии кэннэ үөрэх начаалынньыгар тиэрдиллиэхтэрэ.