“АЗИЯ ОҔОЛОРУН” СҮҮМЭРДЭММИТ ХАМААНДАТЫН КЫТТА КӨРҮСТҮЛЭР

Бэҕэһээ, бэс ыйын 26 күнүгэр, Николай Тарскай аатынан «Туймаада» стадиоҥҥа күүтүүлээх-кэтэһиилээх VIII-с «Азия оҕолор» Норуоттар икки ардыларынааҕы спортивнай оонньуулар уоттара уматылынна. Трибуналары толору мустубут оҕо спордун сэҥээрээччилэр иннилэринэн 26 тас дойдуттан, 5 Арассыыйа регионуттан Саха сирэ тэрийэр спорт бырааһынньыгар кытта кэлбит хамаандалар сэлэлии хаамтылар.

Саха Өрөспүүбүлүкэтин сүүмэрдэммит хамаандатын спортсменнарын бу иннинэ “Триумф” спорт уораҕайыгар Ил Дархан Айсен Николаев, Ил Түмэн физическэй култуураҕа уонна спорка сис кэмитиэтин бэрэссэдээтэлэ, 1996 сыллаахха буолан ааспыт бастакы “Азия оҕолоро” спортивнай оонньуулар боксаҕа чөмпүйүөнэ, Пекиннээҕи Олимпийскай оонньуулар боруонса призера, аан дойду боруонса призера, Европа уонна Арассыыйа элбэх төгүллээх чөмпүйүөнэ, Арассыыйа спордун үтүөлээх маастара Георгий Балакшин, бастакы “Азия оҕолорун” көҥүл тустууга чөмпүйүөнэ, Азия чөмпүйүөнэ, аан дойду боруонса призера, икки Олимпийскай оонньуу кыттыылааҕа, Саха Өрөспүүбүлүкэтин физическэй култуураҕа уонна спорка миниистирэ Леонид Спиридонов эҕэрдэлээтилэр.

Өрөспүүбүлүкэ Аҕа Баһылыга Айсен Николаев 1996 сыллаахха Олимпийскай оонньуулар 100 сылларыгар анаан Саха сирин Бастакы Бэрэсидьиэнэ Михаил Николаев көҕүлээн, тэрийэн ыыппыт бастакы “Азия оҕолоро” Оонньуулар бүгүн аан дойду улахан билиниинэн туһаналларын, онон бу күннэргэ аан дойду бүтүннүүтэ долгуйа кэтээн көрө-истэ олорорун санатта. Сүүмэрдэммит хамаанда хас биирдии спортсмен оҕото, бэйэтин төрөөбүт-үөскээбит улууһуттан, үөрэнэр оскуолатыттан саҕалаан, уһун, кичэллээх бэлэмнэниини ааспытын, спорка ылбыт уопута инникитин улахан спорка үктэнэригэр төһүү буолуоҕун, спорка уонна тус олоҕор улахан кыайыыларга, ситиһиилэргэ тиэрдиэҕин бэлиэтээтэ. Ол курдук, урукку Оонньууларга кыттыбыт спортсмен-оҕолортон 30-н тахса аан дойду, Олимпийскай оонньуулар чөмпүйүөннэрэ, призердара тахсыбыттарын иһитиннэрдэ итиэннэ быйылгы Оонньууларга кыттар оҕолору бүтүннүүлэрин Сахаларын сирэ, Арассыыйа өйүүллэрин, кыайыылары, ситиһиилэри баҕаралларын тоһоҕолоото, чаҕылхай кыайыылары баҕарда.

Георгий Балакшин спортсмен оҕолорго бу кэм устата улахан бэлэмнэниини ааспыттарын, билигин бүтэһик көнөҕө тахсыбыттарын, онон үчүгэйдик баһылаабыт үөрүйэхтэрин оҥороллоро эрэ хаалбытын, бу кинилэргэ саҕалааһын эрэ буоларын, улахан күрэхтэһиилэр иннилэригэр туралларын, Олимпиада мэтээллэрин аҕалыахтаахтарын, онуоха эрэниэхтээхтэрин, күүскэ дьарыктаныахтаахтарын эттэ.

Леонид Спиридонов «Азия оҕолоро» Оонньуулар Дьокуускайга эргиллэн саҕаланан эрэллэринэн Өрөспүүбүлүкэ Аҕа Баһылыга Айсен Николаевка махталын биллэрдэ. Бу иннинэ Владивостокка буолан ааспыт Оонньууларга спортсмен оҕолорбут 37, ол иһигэр  11 кыһыл көмүс мэтээли ылаттаабыттарын санатта уонна бу сырыыга, дьиэлэригэр-уоттарыгар, үчүгэй көрдөрүүлэри ситиһэллэригэр, 50 мэтээли ылалларыгар сорудахтаата.

Хапытаан, көҥүл тустууга Уһук Илин уонна Бүтүн Арассыыйа түһүлгэлэрин үрүҥ көмүс призера, Роман Дмитриев кэриэһигэр Норуоттар икки ардыларынааҕы турнир кыайыылааҕа Айхан Кривошапкин, сүүмэрдэммит хамаанда аатыттан бары спорт быраабылаларын тутуһан күрэхтэһэргэ, хас биирдии спортсмен оҕо уһуйуллубут маастарыстыбатын көрдөрөргө, ситиһиилээхтик кыттарга бэлэмин, оҥоһуллубут уонна баар өйөбүллэр иһин махтаналларын биллэрдэ.