«Азия оҕолоро» волонтердары күүтэр

2022 сылга Приморскай кыраай сиригэр-уотугар Владивосток куоракка “Азия оҕолоро” VII-с Аан дойдутааҕы спортивнай оонньуулар ыытыллаллар. Манна волонтерунан 16 сааһын туолбут ким баҕарар буолуон сөп.
Волонтердар Оонньуу сүрүн блоктарыгар кыттыахтара, ол иһигэр: атташе (хамаанданы, дэлэгээссийэни арыаллааһын); иһитиннэрии (иһитиннэрэр стойкаҕа үлэ); аккредитация (спортсменнарга бейджтэри биэрии); көрсүһүү-атаарыы (кыттааччылары арыаллааһын, көмөлөһүү); көрдөрөр-иһитиннэрэр эйгэ үлэһиттэригэр көмөлөһүү уо.д.а.
Волонтердар үлэлиир кэмнэрэ – от ыйын 23 – атырдьах ыйын 8 күннэрэ. Оонньууга ылыллыбыт волонтердары Владивосток куоракка устудьуоннар уопсайдарыгар олордуохтара, анал үөрэх ыытыахтара, аныгы форма биэриэхтэрэ, үлэҕэ тахсыбыт күннэриттэн аһылык, айан, ону таһынан үлэлэрин түмүгүнэн махтал сурук, наҕараада бэриллэр. 
Волонтер буолуон баҕалаахтар маннык сайтка киирэн 2022 сыл кулун тутар 1 күнүгэр диэри регистрация ааһаҕыт: https://vlapostok2022.com/ .