«Азия оҕолоро» оонньуулары көрсө икки саҥа эбийиэк арыллыаҕа

Куорат баһылыга Евгений Григорьев, былаас ситэриилээх уорганнарын уонна биэдэмистибэлээх тэрилтэлэрин салайааччылара кыттыылаах мунньахха Дьокуускай куоракка 2024 сылга ыытыллыахтаах «Азия оҕолоро» Норуоттар икки ардыларынааҕы VIII-с спортивнай оонньууларга бэлэмнэнии боппуруостарын дьүүллэстилэр.  

Сүрүн боппуруостартан биирдэстэринэн спортивнай эбийиэктэри тутуу уонна өрөмүөннээһин буолла. Евгений Григорьев бэлиэтээбитинэн, «Азия оҕолоро» оонньуулары көрсө икки саҥа эбийиэк – Сайсары оройуонугар элбэх хайысхалаах спортивнай саала уонна Хатас сэлиэнньэтигэр спорткомплекс үлэҕэ киириэхтэрэ.

Итини сэргэ 14 эбийиэк өрөмүөннэнэрэ былааннанар. Ол иһигэр – «Кыайыы 50 сыла» Спорт дыбарыаһа, «Триумф» спортивнай бэлэм киинэ, «Дохсун» спорткомплекс, «Эллэй Боотур» муус дыбарыаһа, «Чолбон» уонна «Самородок» бассейннар, «Модун» спорткомплекс, «Туймаада Н.Н. Тарскай аатынан» стадион, Р.М. Дмитриев аатынан өрөспүүбүлүкэтээҕи Олимпийскай резервэ училищета уо.д.а.

2024 сыл бэс ыйын 25 күнүттэн от ыйын 7 күнүгэр диэри ыытыллар «Азия оҕолоро» Норуоттар икки ардыларынааҕы VIII-с спортивнай оонньууларга спорт 24 көрүҥэр күрэхтэһиэхтэрэ.