«Азия оҕолоро» Оонньуулары хааччыйыыга 31 медпуун тэриллиэҕэ

VIII-с «Азия оҕолоро» Оонньуулары хааччыйар сыаллаах 31 медпуун тэриллээри турар, ол иһигэр: 15 – суукканы эргиччи үлэлиир, 16 – күнүс үлэлиир. Ол туһунан доруобуйа харыстыбалын миниистирин бастакы солбуйааччы Дмитрий Сергин брифиҥҥэ иһитиннэрдэ.
«Медпууннар үлэлэригэр Дьокуускай куорат уонна Амма, Алдан, Үөһээ Бүлүү, Бүлүү, Горнай, Мэҥэ Хаҥалас, Нам, Нерюнгри, Сунтаар, Таатта, Томпон, Уус Алдан, Хаҥалас, Чурапчы о.д.а. улуустар медицинскэй тэрилтэлэрин үлэһиттэрэ тардыллыахтара. Суукканы эргиччи үлэлиир пууннар Оонньуулар кыттыылаахтара, тренердэр, хамаандалар бэрэстэбиитэллэрэ, култуурунай бырагыраама кыттыылаахтара, волонтердар олорор сирдэригэр үлэлиэхтэрэ. Күнүскү бириэмэҕэ үлэлиир пууннар күрэхтэһиилэр буолар сирдэригэр туруохтара»,– диэтэ Дмитрий Сергин.