«Азия оҕолоро» Оонньууларга диэри бүтүөхтээх

Муус устар 29 күнүттэн бэс ыйын 15 күнүгэр диэри «Азия оҕолоро» Оонньууларга диэри Дьокуускайга уулусса-суол ситимин абырахтыыр «дьаама өрөмүөнэ» ыытыллар. Аспаалы ууруу итии симиэһи кутуу ньыматынан оҥоһуллар. 
Олохтоох дьаһалта Куораты тутууга уонна тырааныспар инфраструктуратыгар департаменын Тырааныспар уонна суол хаһаайыстыбатыгар управлениетын начаалынньыга Василий Амбросов иһитиннэрбитинэн, суолу оҥорооччулар уопсайа 9 биригээдэнэн, ол иһигэр 97 оробуочай, 29 тиэхиньикэ буолан үлэлииллэр.
«Азия оҕолоро» Оонньууларга диэри улахан үлэ ыытыллаары турар. Уопсайа 20 тыһ. кв/м иэннээх суолу оҥоруохтаахпыт. Маннык хабааннаах үлэни урукку сылларга сезон устата былаанныыр буоллахпытына, быйыл, «Азия оҕолоругар» бэлэмнэнии чэрчитинэн, балтараа ый иһигэр түмүктүөхтээхпит»,– диир Василий Амбросов. Ол туһунан Олохтоох дьаһалта пресс-сулууспата иһитиннэрэр.