«Азия оҕолоро» оонньууларга атыылаһыллыбыт оптуобустар Дьокуускайга хаалыахтара

Ыам ыйын 2 күнүгэр ВКонтакте социальнай ситимҥэ буолан ааспыт быһа эпииригэр куорат баһылыга Евгений Григорьев балаҕан ыйыгар диэри куорат оптуобустарын маршруттарын кытта саҥа ирдэбиллэргэ сөп түбэһэр дуогабардары баттаһыы ыытылларын этэн турар.
Санатар буоллахха, куорат уопсастыбаннай тырааныспарын ситимин киэҥ хабааннаах уларыйыы күүтэр. Ону хааччыйарга  кэлиҥҥи икки сылга атыылаһыллыбыт 150 саҥа оптуобуска эбии 200 массыына ирдэнэр. Бу үлэнэн СӨ тырааныспар уонна суол хаһаайыстыбатын министиэристибэтэ дьарыктанар.
Уопсастыбаннай тырааныспар боппуруоһа «Азия оҕолоро» Оонньуулары кытта эмиэ быһаччы ситимнээх. Ол курдук, Оонньуулар кыттыылаахтара айанныыр суолларын устун 50 оптуобус тохтобула туруоруллубут, тырааныспар министиэристибэтэ оонньууларга Volgabus Серпантин мааркалаах уон саҥа оптуобуһу атыыласпыт. Евгений Григорьев бу оптуобустар Оонньуулар бүттэхтэринэ «ЯПАК» МУТ бэриллэллэрин иһитиннэрдэ.
Оптуобус пааркатын саҥардарга лиизин ньымата үлэлиирин билэбит. Тырааныспар министиэристибэтэ саҥа оптуобуһу атыылаһарга ананар субсидия кээмэйин 6 мөл. солк. улаатыннарары былаанныыр. 
Быһа эпиир кэмигэр Евгений Григорьев Олохтоох дьаһалта уопсастыбаннай тырааныспар үлэтин тупсарар сыалтан өҥөнү оҥорооччулары уонна нэһилиэнньэни кытта ыкса ситимнээх үлэ ыытылларын, хас биирдии маршрут табыгастаах уонна көдьүүстээх буолара толкуйданарын иһитиннэрдэ. Маны сэргэ үлэ бу хайысхата ордук көдьүүстээх буоларын туһугар брутто-контракт ньыматыгар көһөр табыгастааҕын ыйда, диэн иһитиннэрэр Олохтооох дьаһалта пресс-сулууспата.