02.08.2022 | 13:59

“Азия оҕолоро” норуоттар икки ардыларынааҕы спортивнай оонньуулар суолталара сүдү

“Азия оҕолоро” норуоттар икки ардыларынааҕы спортивнай оонньуулар суолталара сүдү
Ааптар: Баһылай Посельскай

Бу күннэргэ Владивостокка “Азия оҕолороНоруоттар икки ардыларынааҕы VII-c спортивнай оонньуулар үгэннээн бара тураллар. 120 спортсменнаах, 50 тренердээх уонна бэрэстэбиитэллэрдээх Саха сирин сүүмэрдэммит хамаандатын СӨ Ил Дархана Айсен Николаев Оонньууларга көтүөхтэрин иннинэ анаан-минээн көрсөн, спортивнай форма биэртэлээн, алҕаан, ситиһиилэри баҕаран атаарбыта.

 

“Азия оҕолоро” Оонньуулар 1996 сыллаахха аан бастаан Саха сиригэр ыытыллыбыттара.  Оонньуулары СӨ Бастакы бэрэсидьиэнэ Михаил Ефимович Николаев көҕүлээн тэрийбитэ. Түөрт сылга биирдэ ыытыллар үтүө үгэс олохтонон, алта бастакы сайыҥҥы Оонньуулар Дьокуускайга үрдүк тэрээһиннээхтик буолан ааспыттара. 2019 сыллаахха 1-кы кыһыҥҥы Оонньуулар Сахалиҥҥа ыытыллан баран, бу  Приморскай кыраайга VII-с сайыҥҥы Оонньуулар аан бастаан ыытылла тураллар.

Оҕолор Спортивнай    оонньууларын суолтата улахан. Ыытыллар куораттарыгар сайдыы, хамсааһын барар. Бу да сырыыга оннук. Билигин аан дойду балаһыанньата төһө да уустуктардааҕын иһин, Азия дойдулара хото кэлбиттэр. Приморскай кыраайга спорт структурата уонна материальнай база улаханнык тупсарыллыбыттар.

Ити от ыйын 28 күнүгэр тыһыынчанан көрөөччүлэринэн туолбут Владивосток “Фетисов Арена” спорт комплексыгар Оонньуулары үөрүүлээхтиктик арыйыыга арылхайдык көһүннэ. Элбэх омугу, национальноһы түмэр Улуу Арассыыйа дириҥ сайдыылаах култууратын итэҕэтиилээхтик үҥкүүлээн-ыллаан көрдөрүү болҕомтону тарта, долгуйууну үөскэттэ. Икки тыһыынчаттан тахса спортсмен, тренердэр ньиргиэрдээх парадтарыгар Азия дойдуларыттан, Арассыыйа регионнарын сүүрбэ хамаанда, олор истэригэр СӨ сүүмэрдэммит хамаандата биир ньыгыл кэккэҕэ хааман киирдилэр.

Арассыыйа бэрэсидьиэнэ Владимир Путин ыыппыт эҕэрдэтин Арассыыйа бэрэсидьиэнин көмөлөһөөччүтэ, РФ Госсэбиэтин сэкирэтээрэ Игорь Левитин ааҕан иһитиннэрдэ. Спорт миниистирэ Олег Матыцин, Арассыыйа Олимпийскай кэмитиэтин бэрэсидьиэнэ Станислав Поздняков, Приморскай кыраай губернатора Олег Кожемяко, Владивосток куорат баһылыга Константин Шестаков, Норуоттар икки ардыларынааҕы “Азия оҕолорун” кэмитиэтин бэрэсидьиэнэ Владимир Максимов эҕэрдэ тыллары эттилэр.

Үөрүүлээх түгэҥҥэ Сахабыт сирин киэн туттар спортсменнара, көҥүл тустууга Олимпийскай оонньуу чөмпүйүөнэ Павел Пинигин  Арассыыйа былааҕын тутуһан киллэристэ. Дьокуускайга ыытыллыбыт бастакы “Азия оҕолорун” көҥүл тустууга чөмпүйүөнэ, СӨ физическэй култуураҕа уонна спорка миниистирэ Леонид Спиридонов, боксаҕа чөмпүйүөн, Олимпийскай оонньуулар боруонса призера, СӨ Аҕа баһылыгын сүбэһитэ Георгий Балакшин эмиэ Оонньуулар былаахтарын тутан киирбиттэрэ кэрэ-бэлиэ түгэн буолла.

“Азия оҕолоро” VII-c Спортивнай оонньуулар үөрүүлээхтик аһыллыыларын түгэнэ художественнай гимнастикаҕа Олимпийскай чөмпүйүөн Лидия Ахаимова Оонньуулар уоттарын уматыытынан түмүктэннэ.

Бүтүн Арассыыйатааҕы “Океан” лааҕырга түһэн олорор Саха сирин сүүмэрдэммит хамаандатын оҕолорун, кинилэр тренердэрин кытта Саха сирин салайааччылара көрүстүлэр.  СӨ Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев, СӨ физическэй култуураҕа уонна спорка миниистирэ Леонид Спиридонов, спорка солбугу бэлэмниир СӨ киинин дириэктэрэ Василий Егоров эдэр спортсменнарга эҕэрдэлэрин тиэрдэн, түөрт сылга биирдэ буолар “Азия оҕолорун” VII-с Спортивнай оонньууларыгар ситиһиилээхтик кытталларыгар үтүө санааларын тиэртилэр.

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.