Айсен Николаев: Саха сиригэр COVID-free зоналар үлэлэрэ тохтуур

Саха сиригэр коронавирус бразильскай уонна индийскэй штаммнара булуллубуттара, аны ыалдьыбыт оҕолор ахсааннара элбээбит. 
Общепит тэрилтэлэрэ уонна саататар сирдэр бары биир кэлим эрэсииминэн үлэлиэхтэрэ диэтэ Ил Дархан Айсен Николаев. 
Баһылык эппитинэн, от ыйын бүтэһик күннэригэр коронавирус дьаҥынан ыалдьыы ахсаана элбээбитэ, ордук ыччат ортотугар үрдээбитэ бэлиэтэннэ. Дьокуускайга 18-29 саастаахтар ортолоругар кэнники нэдиэлэ аайы ыарыы 25% үрдээбит. 
«Ити, Дьокуускайга хааччахтыыр миэрэлэри киллэрбиппит туһалаабатын көрдөрөр, вакцинация хаамыыта бытаан, ол иһин эбии миэрэлэри ылыныахпытын наада. Бары общепит тэрилтэлэрэ уонна саататар сирдэр бары биир кэлим эрэсииминэн үлэлиэхтэрэ. COVID-free зоналар үлэлэрэ уонна сорох сирдэргэ хааччахтыыр миэрэлэри сымнатыы тохтотуллар.  Ити барыта хааччахтыыр миэрэлэри ирдиирбит уонна ыарыыны тохтоторбут туһугар оҥоһулунна», - диэтэ Айсен Николаев.
Ити быһаарыныыны өрөспүүбүлүкэтээҕи оперштаб өйөөбүт. 
 Ил Дархан Саха сиригэр коронавирус бразильскай уонна индийскэй штаммнара булуллубуттарын санатта, оҕолор ыараханнык ыалдьар түбэлтэлэрин уонна өрөспүүбүлүкэ оройуоннарыгар ыалдьыбыт оҕолорго санавиация ыытылларын эттэ. 
«Сайын дьон аралдьыйан харыстаналлара мөлтөөбүт. Сыбаайба, үбүлүөй ыыталлар, онтон уонунан киһи ыалдьар. Саамай ордук харыстаныы – вакцинация. Вакцинация күүскэ ыытыллыбыт оройуоннарыгар ыалдьыбыт киһи ахсаана аҕыйах», - диэн түмүктээтэ Айсен Николаев.