Айсен Николаев ийэ Сылын биллэрдэ

Өрөспүүбүлүкэҕэ үбүлүөйдээх 2022 сылы Ил Дархан Айсен Николаев ийэ Сылынан биллэрдэ. Ил (Түмэн) Судаарыстыбаннай Мунньаҕар туһуламмыт суругар кини хас биирдии киһи олоҕор дьахталлар, ийэлэр ураты оруоллаахтарын бэлиэтээбит. Бу туһунан СӨ Баһылыгын уонна Бырабыыталыстыбатын пресс-сулууспата иһитиннэрдэ. 
«Саха сирин норуоттарыгар, тыйыс усулуобуйаҕа, дьахтар, ийэ мэлдьи сылааһы уонна холку быһыыны төрүттээччи буолар. Кини дьиэ кэргэн киинэ буолан дьонун харыстыыр, тапталынан уонна сырдык сыдьаайынан толорор. Саха сирин хас биирдии ийэтин дьолугар бүтүн уопсастыба дьоло түмүллэр. Ити – биһиги билиҥҥи уонна кэлэр кэмҥэ ситиһиилээх сайдыыбытыгар дьоһун сыаннаспыт уонна майгы-сигили өттүнэн тирэхпит. Итини бигэргэтэн туран, үбүлүөйдээх 2022 сылы Саха Өрөспүүбүлүкэтигэр ийэ Сылынан биллэрэбин», – диэбит Айсен Николаев. 
Баһылык ийэлэр, дьахталлар олорор, алтыһар уонна карьераларын оҥостор усулуобуйаларын тэрийии дьоһун суолталааҕын бэлиэтээбит уонна ийэ буолуу уонна оҕо саас сытыы кыһалҕаларын быһаарыыны түргэтэтэр туһунан эппит. 
«Ааспыт сүүс сыл тухары Саха сирин дьахталларын олоҕо тосту уларыйда. Кинилэр ситиһиилээх карьераны оҥостоллор, бары эйгэҕэ чулуу исписэлиистэринэн буолаллар. Дьахталлар идэлээх уонна уопсастыбаннай көҕүлээһиннэрэ инникигэ хардыыбыт генараторын быһыытынан булгуччу олоххо киириэхтээхтэр. 100 сыллаах үбүлүөйү тэрийэргэ уонна ыытарга Саха сирин ийэлэрэ саамай көхтөөх кыттааччы буолуохтара диэн эрэнэбин. Ийэ Сылыгар уопсастыбаҕа дьахтарга, ийэҕэ ытыктабыл таһымын үрдэтиэхтээхпит», – диэн кини эбэн эппит.