Айсен Николаев архитектура пааматынньыктарын чөлүгэр түһэриигэ аналлаах мунньаҕы ыытта

Чөлүгэр түһэриллэр тутууларга Дьокуускайдааҕы Троицкай кафедральнай собор, Реальнай училище, Эр дьон прогимназията, Шергин шахтата о.д.а. киирсэллэр. 
«Мас куорат/Якутск деревянный. Залог» диэн уопсай ааттаах бырайыак туһунан дакылааттары истэн баран, Ил Дархан  экспертизалары ааһа охсон, историческай тутуулары чөлүгэр түһэрии былаанын бигэргэтиигэ киллэрэргэ сорудахтаата. 
Маны сэргэ Ил Дархан, бырайыак маастар-былаана суоҕун бэлиэтээн туран, маастар-былаан булгуччулааҕын бэлиэтээтэ итиэннэ былыргы тутуулар, ааспыт кэм тыынын илдьэ туралларынан, билиҥҥини сыаналаан, кэлэр кэскили тутарга акылаат буолалларын санатта.
Мунньахха Дьокуускай уонна Ленскэй архиепискоба Роман Владыка, Култуура нэһилиэстибэтин эбийиэктэрин харыстыыр департамент салайааччыта Николай Макаров, тутуу миниистирэ Павел Кылатчанов, экономика миниистирэ Майя Данилова, Дьокуускай куорат баһылыгын солбуйааччы Георгий Гаврильев, Бүтүн Арассыыйатааҕы история уонна култуура  пааматынньыктарын харыстыыр уопсастыба Саха сиринээҕи региональнай салаатын сэбиэтин бэрэссэдээтэлэ Руслан Васильев, бу уопсастыба Дьокуускай куораттааҕы салаатын бэрэссэдээтэлэ Андрей Высоких о.д.а. кыттыыны ыллылар.
Киин куорат историческай пааматынньыктарын чөлүгэр түһэрии Саха сирэ Арассыыйа судаарыстыбатын састаабыгар киирбитэ уонна Дьокуускай куорат төрүттэммитэ 400 сылын көрсө ыытыллар, диэн иһитиннэрэр СӨ Баһылыгын уонна Бырабыыталыстыбатын пресс-сулууспата.