«Айар Уустар» чемпионат түмүктэннэ

Эҕэрдэ тылы СӨ бырабыыталыстыбатын Бэрэссэдээтэлин солбуйааччы Анатолий Семенов, СӨ Үөрэҕириигэ уонна наукаҕа миниистирэ  Нюргуна Соколова эттилэр.

«Бу чемпионат – дьоһун суолталаах тэрээһин. Өрөспүүбүлүкэҕэ креативнай индустрияны сайыннаран, итиннэ олоҕуран бүтүн салааны оҥоруохпутун баҕарабыт. Эмиэ итинник IT-салааны оҥорбуппут, онтубут 2021 сылга 4,5 миллиард солкуобайы оҥорон таһаарда, итиннэ нолуок, оробуочай миэстэлэр киирэллэр. Анимацияҕа, дизайнҥа, муодаҕа уонна да атын хайысхаларга улахан хардыыны оҥоруохпутун сөп, итиннэ каадырдар, талааннаах ыччаты булуу, уһуйуу наадалар. Кинилэр аан дойду да ырыынагар ситиһиилэнэр кыахтаахтар диэн эрэнэбин», – диэн бэлиэтээтэ Анатолий Асколонович.

Кыайыылаахтары компетенцияларынан наҕараадалаатылар: «Цифровой модельер», «Көмпүүтэр оонньууларын уонна мобильнай сыһыарыылары оҥоруу», «Көмпүүтэр оонньууларыгар 3Д-моделирование», «Муода технологиялара», «Ювелирнай дьыала», «Хаартыскаҕа түһэрии», «Муодунай таҥас дизайнна уонна аксессуардар», «Анимация», «Графическай дизайн», «Веб-технологиялар», итиэннэ «Информационнай технологиялар», «Муода уонна дизайн» диэн хамаанданан үлэлэри көмүскээһин түмүгүнэн.

Үөрүүлээх тэрээһиҥҥэ «Голос. Дети» бырайыак кыттыылааҕа, «Два голоса» талааннаахтар шоуларын кыайыылааҕа Арина Данилова Москваттан көтөн кэлэн кытынна.

Чемпионат «Айар Уустар» креативнай индустрия колледжын эдэр модельердарын үлэлэрин дефиле-көрдөрүүлэринэн, тэрээһин партнердарыттан («Ахсым» реклама-полиграфия киинэ, «Колибри» маҕаһыын, Газпромбанк, «Leostom» стоматология киинэ) өйдөбүнньүк бэлэхтэри туттарыынан, мусукаан DJ URAAN эҕэрдэ нүөмэринэн түмүктэннэ.