Атыы киинин тутуута 11 сыл кэнниттэн түмүктэннэ

Дьокуускай куорат 114-с кыбаарталыгар «1000 мелочей» атыы киинэ 11 сыл буолан баран тутуллан бүппүтүн туһунан тутааччы «РОСТ» ХЭТ иһитиннэриитэ СӨ судаарыстыбаннай тутуу уонна дьиэ-уот хонтуруолун Управлениетыгар киирбит. 
Управление баһылыга Павел Аргунов кэпсээбитинэн, Ойуунускай – Октябрьскай уулуссалар быһа охсуһууларыгар турар 14 тыһ. кв. м. иэннээх алта этээстээх атыы киинин тутуута 2010 сыллаахха саҕаламмыт уонна 2012 сыллаахха олоххо киириэхтээх эбит. Ол эрэн, кэнники тутуу түмүктэнэр болдьоҕо сыҕарытыллан испит, тутуу кыһалҕалаах эбийиэктэр федеральнай реестрдарыгар киирбит. Уһун сылларга ыытыллыбыт тутуу түмүктэниитэ өрөспүүбүлүкэ бырабыыталыстыбатын уонна былаас федеральнай уорганнарын хонтуруолларынан ыытыллыбыт. 
«Сотору кэминэн ити эбийиэккэ региональнай тутуу хонтуруолун ыытар түмүк бэрэбиэркэ графигын оҥоруохпут. Быйыл, 11 сыл буолан баран, итиннэ ирээттээх кыттыгас дьон сокуонунан бас билэр, күүтүүлээх атыылыыр миэстэлэрин үлэҕэ киллэрэр инилэр диэн эрэнэбит», – диэтэ  Павел Аргунов.