22.03.2023 | 19:00

Атах оонньуутунан уһуннук дьарыктаныахха сөбүн итэҕэттилэр

Ааспыт субуотаҕа “Юность” чэпчэки атлетика манеһыгар сахалыы атах оонньуутугар өрөспүүбүлүкэ чемпионата буолан ааста. Кылыыһыттар, ыстаҥаһыттар, куобахчыттар түмсэн, дьахталлар, бэтэрээннэр – сэттэлии, эр дьон уон иккилии туоска күрэхтэстилэр.
Атах оонньуутунан уһуннук дьарыктаныахха сөбүн итэҕэттилэр
Ааптар: Баһылай ПОСЕЛЬСКАЙ
Бөлөххө киир

Дьахталларга Манчаары оонньууларын чөмпүйүөнэ Хаҥаластан Валерия Олесова үс көрүҥҥэ үһүөннэригэр бастаата. Мэҥэ Хаҥаластан Анна Лыткина – иккис, Намтан Ангелина Иванова үһүс буоллулар.

35-49 саастаах бэтэрээннэргэ ньурбалар киэн туттуулара, номоххо киирбит атах оонньооччу, үс көрүҥ түмүгүнэн олохтообут рекорда билигин да куоһарыллыбакка турар Виталий Васильев кылыыга 25 м 49 см, ыстаҥаҕа 25 м 32 см көрдөрүүлэрдээх абсолютнай кыайыылаах буолла. Куобахха Бүлүүттэн Прокопий Катанов 23 м 72 см түһэн бастаата, үс көрүҥ түмүгүнэн иккис үчүгэй көрдөрүүлэннэ. Намтан спорт маастара Максим Софронов үһүс миэстэлэннэ.

40 саастаах спорт бэтэрээнэ Виталий Васильев санаатын үллэһиннэ:

– Доруобуйам көҥүллүүрүн тухары ыстанар былааннаахпын. МЧС-ка баһаарынай чаас байыаһабын, инньэ гынан эт-сиин өттүнэн бэлэмнээх буолуу ирдэнэр. Оҕолорум үһүөн атах оонньуутун сөбүлүүллэр. Улахан уол Оскар устудьуон. Миэстэлэспэтэр да, күрэхтэһэрин олус сөбүлүүр. Мин кинини атын спорка көрөбүн, бириэмэ көрдөрөн иһиэ. Кыра уол Марат ахсыс кылааска үөрэнэр. Кыыспыт Лейсан детсадка сылдьар, эмиэ ыстаныан, дьарыктаныан баҕата сүрдээх. Кэргэним Александра фитнес тренерэ. Онон спортивнай дьиэ кэргэммит диэххэ сөп. Тааттаҕа буолар Манчаары Оонньууларыгар былааннанабын, сорук туруоруммутум.

50-н үөһэ саастаахтар сүһүөхтэрин үрдүгэр сылдьалларын, тэтиэнэхтэрин көрдөрдүлэр, уон иккилэр. Үөһээ Бүлүү Мэйигиттэн физкултуура учуутала Василий Санников үс көрүҥ түмүгүнэн бастаата. Чурапчыттан Илья Дыдаев уонна Владимир Софронов иккис, үһүс миэстэлэргэ тигистилэр. Чурапчы бэтэрээннэрэ Дмитрий Макаров куобахха бастаата, Афанасий Дорофеев иккис буолла. Эдэр саастарыгар аатырбыт Николай Санниковы, Иван Гороховы кытта бииргэ күрэхтэспит, өрөспүүбүлүкэҕэ миэстэлэһэр, дэгиттэр спорт маастара 69 саастаах Владимир Алексеев төрөөбүт-үөскээбит Сунтаарын аатыттан кытынна уонна, кылыыга иккис миэстэлэнэн, атах оонньуутугар уһуннук кыттыахха, күрэхтэһиэххэ сөбүн итэҕэттэ.

Күүтүллүбүтүн курдук, хатыһыылаах түсүһүүлэр күннэригэр сылдьар эр дьоҥҥо буоллулар. Мэҥэлэр күннээтилэр. Сергей Захаров кылыыга 44 м 62 см, ыстаҥаҕа 44 м 04 см түһүтэлээн бастаата. Куобаҕар 39 м 57 см түһэн иккис үчүгэй көрдөрүүлэннэ уонна абсолютнай чөмпүйүөн үрдүк аатын ылла. Ньурбаттан Эрэл Тихонов 41 м 25 см куобахтаан, олус үчүгэй көрдөрүүнү ситистэ. Майа спортоскуолатын тренерэ, өрөспүүбүлүкэ уһуну ойууга рекордсмена Игорь Скрябин 44 м 11 см кылыйан, 44 м 02 см ыстаҥалаан, 37 м 15 см куобахтаан, үс көрүҥ түмүгүнэн – иккис, Намтан спорт маастара, тренер Владислав Попов үһүс миэстэлэннилэр. Мэҥэ Хаҥалас атах оонньооччуларын тренердэр Борис Ильин уонна Петр Илларионов бэлэмнииллэр.

Өрөспүүбүлүкэ ыстаҥаҕа рекордсмена Горнайтан кыттар Чурапчы ыччата Кай Адамов кылыыга уонна ыстаҥаҕа үһүс буолла. Өрөспүүбүлүкэ күүстээх маастардара Кэбээйиттэн Яков Дмитриев, Тааттаттан куобах рекордсмена Андрей Васильев кыттыбатылар.

Ааспыт үйэ кынаттаах кылыыһыта, рекордсмена, дэгиттэр спортсмена Иван Горохов күрэхтэһии хаамыытын сыныйан көрдө, кыайыылаахтарга уонна бириистээх миэстэлэргэ тиксибиттэргэ наҕараадалары туттартаата.

 Күрэхтэһии Мэҥэ Хаҥалас, Чурапчы, Таатта, Нам, Хаҥалас, Горнай, Бүлүү, Үөһээ Бүлүү, Ньурба, Сунтаар, Кэбээйи, Булуҥ, Дьокуускайтан “Модун”, Тулагы, ХИФУ хамаандалара кыттыылаах буолан ааста.

Сонуннар

Ордук ааҕаллар

Полина Победа:  «Дьоллоох буолуҥ олоххутугар, түүлгүтүгэр»
Дьон | 29.02.2024 | 10:00
Полина Победа: «Дьоллоох буолуҥ олоххутугар, түүлгүтүгэр»
Бүгүҥҥү ыалдьыппын улаханнык билиһиннэрэр да наадата суох буолуо. Кинини, өрөспүүбүлүкэ сахалыы тыллаах олохтоохторо ПОЛИНА ПОБЕДА диэн ааттаах хоһоонньуту, социальнай ситим устун билбиттэрэ ыраатта. Полина Пантелеймоновна Находкина хомоҕой тыллаах хоһоонноро элбэх киһи кутун туталлар, махталын ылаллар. Кини ону таһынан имигэс үҥкүүһүт, шпагат түһэр, араас эрчиллиилэри холкутук оҥорор, төбөтүн оройугар турар –...
Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...