Ат уонна киһи - 6

Үөһэттэн айдарыыларынан, өйдөрүнэн, эттэринэн-хааннарынан Айыылартан  алтыһыылара

Туйах хатарыллыыта салҕанар

Удьуор утума, туйах хатарыллыыта өссө салҕанна. От ыйын 4 күнэ. Төрдүс сүүрүү—2000 м. “Югория” страховкалыыр хампаанньа бирииһэ: 1-кы миэстэ—75 000 солк., 2-с м. – 45000 солк., 3-с м. –  35000 солкуобай. Ити ботуччу харчы үс  саастарыттан үөһэ Саха сиригэр төрөөбүт ыраас хааннаах сүүрүк боруодалары үөскэтэри өйүүргэ анаммыта. Бу испииһэккэ бары үс саастаахтар киирбиттэр. Кинилэр бары ый аҥаарын анараа өттүгэр сүүмэрдээһиҥҥэ 1600 м аны сайыҥҥы “Дерби” улахан бирииһин  былдьаһар быраабы ылбыттара. Тоҕус тиҥэһэттэн биирдэрэ күрэхтэһэ тахсыбата. Барыларыттан элбэх аҕыс күрэхтэһиигэ кыттыбыт, былырыыҥҥы тыйдарга биир бастыҥынан сылдьыбыт  кугас атыыр Губернатор (Чурапчы) сүүрдээччитин олордумаары, сиэтээччини тула эргийэн, соһоору, мүччү туттараары тэлэкэччийэн, туора ыстана сатыыр. Ийэтэ Германика эмиэ итинник мөхсөрө. Стартка тиийбэккэ эрэйдиирэ, онтон аҕалбат буолбуттара. Бу субуотатааҕы алта старт тухары күрэхтэһэр түөрт атахтаахтартан кини уола ити кыҥкыйдаата. Атыттар бары улгумнук сылдьыбыттара. Хата, тута сылдьааччы боксаҕа кыл мүччү баттаһан укта. Онно үүннээччи киирэн кыараҕаска мииннэ. Стартка Сунтаар ата  өрө мөҥөн, боксаттан хойутаан таҕыста.  

Комментатор Александр Капитонов, билэттиир буолан, хайалара баҕарар бастыан сөп диэтэ.  

Көрдөрүүтүнэн Түмэн ордук рейтиннээх. Сэттэтэ сүүрбүтүттэн биэһигэр бастаан, иккитигэр иккис буолан, хаҥаластары айхаллаппыта, тренерин, мин амыдайым Иван Ушницкайы уруйдаппыта аҕай. Былырыын өрөспүүбүлүкэ бастыҥ тыйынан ааттаммыта.      Быйылгы сүүмэрдиир күрэхтэһиигэ икки бөлөхтөн  саамай түргэн бириэмэни көрдөрбүт. Онон кинини бастакы фаворитынан ааттыыллар. Киниттэн Николь (Мэҥэ Хаҥалас), Гоин Ап (Сунтаар), Арктика (Мэҥэ Хаҥалас) балайда хаалбыттара. Атын бөлөххө Арылхан (Нам) бастаабыта. Бириэмэтэ Төлөҥҥө  0,00,1 суотайынан тиийбэтэҕэ эрээри, кини былырыыҥҥы тыйдарга биир бастыҥынан сылдьыбыт Губернатортан Арктик Бойтан (Амма), Норд Стартан (Мэҥэ Хаҥалас) балайда чорбойбута. Ол эрээри ааспыкка ардахтаах түүн кэннэ, сииктээх сарсыарда арыый кылгас  дистанцияҕа көрөөччүтэ суох бастакы сүүрүү этэ. Билигин улахан бириистээх күрэхтэһии, онон тактиката атын. 

 Дьэ, манна илин-кэлин түсүһүү бастакы көнөттөн тута саҕаланна. Түмэн бастыахча гынан истэҕинэ, кинини былырыын кыайа сылдьыбыт Норд Стар ситтэ. Онтон Арылхан инники тахса сырытта. Итиннэ биэс ат  чугас-чугас чөмөхтөстүлэр. Артик Бой икки аты ситэн үһүскэ тахсан, салгыы иккискэ сылдьыбыт Түмэҥҥэ кимтэ.  Онтон, хаптас гынаат, супту түһэн, иккиэннэрин хоһулатан ситэн ааста. Аҕыйахта ойоот, Норд Стартан  түөрт ат устатын кэриҥэ атта.

1 миэстэ –  Арктик Бой (Амма) – 2 мүн.18.4.сөк. Боцман туйаҕын хатарааччытын, Абаҕатааҕы «Строд»  ТХКХ тиҥэһэтин Москваҕа киин ипподромҥа арҕааҥҥы аттарынан кыайбыт С. Тимофеев сүүртэ. Тренер Н.Громов.

2-с миэстэ –  Норд Стар (Мэҥэ Хаҥалас) —2.19.6.

3-с миэстэ –  Түмэн (Хаҥалас)—2.20.0. Киниэхэ биэтэк чугаһыгар Арылханынан бирииһи былдьаһарга дураһыйыы табыллыбата.