Ат уонна киһи - 4

Үөһэттэн айдарыыларынан, өйдөрүнэн, эттэринэн-хааннарынан Айыылартан  алтыһыылара

Удьуор утума

Иккис сүүрдүү. "Критериум". 1000 м.  Бирииһэ – 125 тыһыынча солк. Спонсора – Өрөспүүбүлүкэтээҕи инвестиционнай хампаанньа.

Иккилэриттэн үөһэ саастаах ыраас хааннаах биэс ат барыа.

Дьон үксэ 2 №-дээх Варадероны (Амма, Абаҕа, «Строд» ТХПК) эбэтэр  Суфражистканы (Нам) уксарга талаллар. Бу икки аты Ил Дархан бирииһигэр 2400 м сүүмэрдээһиҥҥэ мээнэҕэ киллэрбэтэхтэрэ чахчы.  Баҕар, инникигэ бэлэмнииллэрэ буолаарай? Фаворит Дайн Кениг кэнниттэн иккис-үһүс кэлбиттэрэ.  Ол эрээри тоҕо эрэ бу кылгас дистанцияҕа киллэрдилэр. 

Амма эрэлэ Варадеро (Аҕата – Акбаш Казах, ийэтэ – Вальтана) 6 саастаах тураҕас атыыр. (Сүүрдээччи –   С.Тимофеев, хомуһуола саһархай, санна халлаан күөхтүҥү, тренер – Н. Громов).

Намнар биэс саастаах биэлэрэ Суфражистка 3 №.  Маҥан ураанньыктаах тураҕас. Ытык сылгылартан ыйаахтаах, төрүт сүөһүлэртэн төлкөлөөх, ааттаах аттартан айдарыылаах. Аҕата –  Инкандесент Стар, ийэтэ – Суламифь Доннааҕы сылгы собуотугар  Америкаттан аҕалыллыбыттар. Аҕатынан убайа – билигин Арассыыйа биир бастыҥ быһыйа. Бас билээччи – А.Еремеев, сүүрдээччи – И. Иванов, хомуһуола от күөҕэ. Маастар-тренер – С.Ядреев).

Кинилэри кытта үһүс буолар идэлээх, 5№ -дээх,  10 саастаах уопуттаах Кул Джет (Үөһээ Бүлүү) бириис былдьаһыа. Тураҕас (аҕата – Кайтано, ийэтэ – Джатика). Бас билээчи – Н. Еттянов, тренерэ – 1 категориялаах сүүрдээччи А. Сторчеус, хомуһуола, салааттыҥы, онно  кыһыл хаймыылаах).

Икки атын кинилэри кытта испииһэккэ киирбит аттарга Стар Треккэ (Сунтаар) уонна Кыыдаанаҕа (Уус Алдан) дьон оччо аахайбат. Оннук да буолла. Дьиибэтэ баар, икки биэ сүүрбүтүттэн Кыыдаана атыырдары кэннилэриттэн батыһан чугаһаабакка, дьонугар хотторуу хомолтотун биллэрдэ. Оттон Суфражистка бастакыттан барыларыттан куотта. Эрэллээхтик эрэллээх кыайыынан эҕэрдэлэттэ.  Кинини бэйэтин курдук дьүһүннээх тураҕас атыырдар эккирэтэн көрдүлэр да, иннин биэрбэтэ. Варадероттан реванш ылла. Илин-кэлин ситиһиитэ суоҕунан бастакы сүүрүүгэ майгыннаата. Дистанция тухары хайалара хаһыс сылдьыбытынан илин-кэлин түсүһүүтэ суох кэллилэр. Атына диэн, ойдохторун аайы инникилэр бэйэ-бэйэлэриттэн чорбойуулара улаатан истэ.

1-кы миэстэ – Суфражистка (Нам) – 1.03.4

2-с миэстэ – Варадеро (Амма) –  1.04.1

Уонна бу “Критериумҥа” Кул Джет (Үөһээ Бүлүү) үһүс төгүлүн үһүстээтэ –  1.06.6

Уопуттаах мындыр тренер-маастар Суфражисткатын аны буоһатан, киниттэн сыыдам сыспай сиэллээҕи ыларга бүөм санаатын биллэрдэ. Иитиллэр сүөһү иччилэниэхтин.