Архыып сулууспатын 100 сыла бэлиэтэннэ

Үөрүүлээх тэрээһиҥҥэ куорат баһылыгын солбуйааччы – Олохтоох дьаһалта аппараатын салайааччыта Руслан Тимофеев, СӨ Култуураҕа уонна духуобунай сайдыыга министиэристибэтин архыып дьыалатын тэрийиигэ кылаабынай исписэлииһэ Наталья Комкова, Дьокуускай куорат уокуругун Муниципальнай архыыбын дириэктэрэ Светлана Филиппова, Олохтоох дьаһалта Култуураҕа уонна духуобунай сайдыыга управлениетын начаалынньыга Индира Ли кытыннылар.

Олохтоох дьаһалта аатыттан архыып үлэһиттэрин үбүлүөйдэринэн куорат баһылыгын солбуйааччы Руслан Тимофеев эҕэрдэлээтэ.

«Биһиги бары историябытын билиэх, өйдүөх уонна харыстыах тустаахпыт, итиннэ архыып улахан үлэтэ баар. Архыып дьыалатыгар куораттарын уонна өрөспүүбүлүкэлэрин таптыыр уонна ытыктыыр дьиҥнээх патриоттар үлэлииллэр. Куорат архивистара бэйэлэрин үлэлэринэн Дьокуускай 390 сылын бэлиэтээһиҥҥэ улахан кылааттарын киллэрдилэр уонна инники да өттүгэр сүҥкэн сыаллары туруоруналлар», - диэн бэлиэтээтэ Руслан Тимофеев.

Муниципальнай архыып дириэктэрэ Светлана Филиппова 2022 сылга «История города Якутска день за днём, год за годом» кинигэни таһаарбыттарын, Дьокуускай 390 сылыгар уонна Дьокуускай куораттааҕы Дуума 200 сылыгар анаммыт быыстапкалары тэрийбиттэрин туһунан кэпсээтэ.

Олохтоох дьаһалта Култуураҕа уонна духуобунай сайдыыга управлениетын начаалынньыга Индира Ли архивистар үлэлэригэр олус эппиэтинэстээхтик сыһыаннаһалларын, кинилэр сүрүн соруктарынан аныгы информационнай технологиялар көмөлөрүнэн куорат документальнай пуондатын харайыы буоларын бэлиэтээтэ.

«Дьокуускай куорат 390 сыла» үбүлүөйдээх бэлиэнэн Муниципальнай архыып салаатын кылаабынай архивиһын Ольга Матаркинаны наҕараадалаатылар. Архыып бастыҥ үлэһиттэригэр Олохтоох дьаһалта Бочуоттаах грамоталарын уонна Махтал суруктарын туттардылар.

Тэрээһин чэрчитинэн, Нерюнгри оройуонун Муниципальнай архыыбын көҕүлээһининэн, «Кэм капсулата» өрөспүүбүлүкэтээҕи бырайыак-эстафета саҕаланна. Капсуланы кэлэр көлүөнэ архивистара 100 сылынан арыйыахтаахтар. Эстафета өрөспүүбүлүкэ 20-тэн тахса улуустарыгар ыытылынна. Түмүккэ капсула СӨ Национальнай архыыбын харайыытыгар бэриллэр.