Арассыыйа ЫБММ авиацията Сунтаар уонна Ньурба улуустарыгар 200 туоннаттан тахса ууну кутта

Ойуур баһаарын умуруорар сыаллаах Ньурба уонна Сунтаар улуустарыгар Бе-200 амфибия сөмүлүөт Тумул уонна Ойууһут диэн сирдэргэ 178 туонна ууну, Маар сэлиэнньэтин таһыгар уу кутар тэриллээх Ми-8 бөртөлүөт 80 тахса туонна ууну куттулар, ону сэргэ Ньурба улууһугар биэдэмистибэ аэромобильнай бөлөҕө кыттыста. 

Ойууру авиациянан харабыллыыр сулууспа дааннайдарыгар олоҕуран, региоҥҥа 32 ойуур баһаара 13 тыһыынча гектартан тахса иэннээх сиргэ тайаан сытар. Суукка иһигэр ойуур баһаарын иэнэ 2 108 гектарынан улааппыт. 
Уустук балаһыанньа Араҥастаах, Маар уонна Тумул сэлиэнньэлэрин аттыгар оннунан турар. Судаарыстыбаннай баһаары утары сулууспа сотрудниктара Ынахсыт, Үөдэй, Ньурбачаан, Хоро, Далыр уо.о.д.а. сирдэргэ куттал суох буоларын хааччыйар пуостары туруорбуттар. Ойуур баһаардарын утары туох баар күүһү быраҕан туран үлэ барар. 
Санатан эттэххэ, Саха сирин бүттүүнүгэр баһаары утары ураты эрэсиим киирэн турар.