Арассыыйа спорка миниистирэ саҥа спорт комплексын көрдө

VIII-c «Азия оҕолоро» Оонньуулар чэрчилэринэн Дьокуускай куоракка кэлэ сылдьыбыт Арассыыйа спорка миниистирэ Михаил Дегтярев Ильменскэй уулуссаҕа тутуллубут саҥа «Чыпчаал» 9 №-дээх Оҕо спорт оскуолатыгар сылдьан, кыргыттарга өрөспүүбүлүкэ волейболга сүүмэрдэммит хамаандатын дьарыгын көрдө.

Куорат баһылыга Евгений Григорьев дойду таһымнаах миниистиргэ саҥа спорт комплекса «Демография» нацбырайыагынан, «Саха Өрөспүүбүлүкэтигэр физическэй култуураны уонна спорду сайыннарыы» судаарыстыбаннай уонна «2017-2032 сылларга Дьокуускай куорат социальнай инфраструктуратын кэлимник сайыннарыы» муниципальнай бырагыраамаларынан үлэҕэ киирбитин билиһиннэрдэ.

Көрсүһүүгэ Саха Өрөспүүбүлүкэтин Бырабыыталыстыбатын бэрэссэдээтэлэ Сергей Местников, спорт миниистирэ Леонид Спиридонов кыттыыны ыллылар. Дьарыгы өрөспүүбүлүкэ кыргыттар волейболларыгар сүүмэрдэммит хамаандатын тренердэрэ Саргылана Оконешникова уонна Евгения Нестерова ыыттылар.

VIII-c «Азия оҕолоро» Оонньууларга волейбол көрүҥэр барыта 192 спортсмен 6 тас дойдуттан уонна Арассыыйа 4 регионуттан кыттар. Саха сирин хамаандата 24 спортсментан турар – 12 уол уонна 12 кыыс. Оттон күрэхтэһиилэр бэс ыйын 29 - от ыйын 5 күннэригэр ыытыллаллар, диэн иһитиннэрэр Олохтоох дьаһалта пресс-сулууспата.