Арассыыйа күнүнэн наҕараадалары туттардылар

Бэс ыйын 12 күнүгэр, Арассыыйа күнүгэр, Орджоникидзе болуоссатыгар Дьокуускай куорат олохтоохторун СӨ Бырабыыталыстыбатын бэрэссэдээтэлэ Кирилл Бычков, Ил Түмэн бэрэссэдээтэлэ Алексей Еремеев, Куорат дууматын бэрэссэдээтэлэ Альберт Семенов, Уһук Илиҥҥэ саҥа бырайыактары киллэрэр стратегическай көҕүлээһиннэр агентстволарын бэрэстэбиитэлистибэтин салайааччыта Ольга Курилова уонна Дьокуускай куорат баһылыга Евгений Григорьев эҕэрдэлээтилэр.
Бу күн уһулуччу ситиһиилээхтэргэ наҕараадалары, бастыҥ үөрэнээччилэргэ Арассыыйа гражданинын пааспарын туттардылар.
Ол курдук, «Якутия с тобой!» уопсастыбаннай хамсааһын волонтера Петр Федоров «Отец солдата» мэтээлинэн наҕараадаланна. 
Саха Өрөспүүбүлүкэтин уопсастыбаннай хамсааһыннарын көхтөөх кыттыылааҕа Евгения Кушнарева Ил Дархан грамотатытан бэлиэтэннэ.
«Гражданскай килбиэн» анал бэлиэнэн Строительнай уокурук дьахталларын сэбиэтин чилиэнэ, үлэ бэтэрээнэ, култуура туйгуна  Лена Жиркова, Саха Өрөспүүбүлүкэтин уопсастыбаннай хамсааһыннарын көхтөөх кыттыылааҕа Дарья Ануфриева, Олохтоох дьаһалта анал отделын салайааччыта Екатерина Сальникова наҕараадаланнылар. 

Саха Өрөспүүбүлүкэтин Бырабыыталыстыбатын махтал суругунан Ил Дархан уонна Бырабыыталыстыба дьаһалтатын судаарыстыбаннай-быраап боппуруостарыгар департаменын старшай референэ Мария Иванова наҕараадаланна. 
Луганскай норуодунай өрөспүүбүлүкэ анал бэлиэтинэн Дьокуускай куорат баһылыга Евгений Григорьев, «Техностандарт» ХЭТ сүрүн исписэлииһэ волонтер Мария Колодезникова, СӨ Биир кэлим координационнай киинин оперативнай ыстаабын салайааччыта Георгий Куркутов, «Боотур» үөрэтэр-бэлэмниир киин салайааччыта Николай Мартынов, волонтер Антонина Петрова, «Арктическая инновационная компания» ХЭТ дириэктэрэ Иннокентий Стручков наҕараадаланнылар.
Луганскай норуодунай өрөспүүбүлүкэ махтал суругунан СӨ оперативнай ыстаабын логистикаҕа салаатын суоппара Гаврил Птицын, СӨ оперативнай ыстаабын байыаннай сулууспалаахтарга табаарынай-материальнай сыаннастары тиксэриигэ эппиэттээх координатора Майа Романова бэлиэтэннилэр. 
«Ыччат политикатын туйгуна» бэлиэ Дьокуускай куорат Олохтоох дьаһалтатын Информационнай технологияларга киинин истисэлииһэ Лия Тихоноваҕа туттарылынна. 
Маны сэргэ 14 саастарын туолбут бастыҥ үөрэнээччилэр Арассыыйа гражданина буолбуттарын туоһулуур пааспардарын, «Юнармия» байыаннай-патриотическай хамсааһын чилиэннэригэр II, III истиэпэннээх анал бэлиэлэри үөрүүлээх быһыыга-майгыга туттулар, диэн иһитиннэрэр Олохтоох дьаһалта пресс-сулууспата.