«Арассыыйа» быыстапка-форумҥа олоҥхо дьиэрэйдэ

Сылын аайы сэтинньи 25 күнүгэр Саха сиригэр Олоҥхо күнэ бэлиэтэнэр. Бу күн, 2005 сыллаахха ЮНЕСКО саха норуотун эпоһын киһи-аймах материальнайа суох нэһилиэстибэтин уһулуччу үчүгэй айымньытынан билиммитэ.

Быйыл Олоҥхо күнэ Москва куоракка эмиэ бэлиэтэннэ. Норуоттар икки ардыларынааҕы «Арассыыйа» быыстапка-форумҥа Олоҥхо тыйаатырын артыыстара үс күн устата олоҥхону толорон иһитиннэрдилэр.

Саха Өрөспүүбүлүкэтин үтүөлээх артыыһа, биллиилээх олоҥхоһут Валентин Гаврильевич Исаков «Эрбэхчэй Бэргэн» олоҥхону уонна П.А. Ойуунускай «Дьулуруйар Ньургун Боотур» олоҥхотуттан быһа тардан, оттон  Саха Өрөспүүбүлүкэтин култууратын туйгуна Василина Баланова-Кэрэмэс Лынкыр Н.П. Бурнашев «Кыыс Дэбилийэ» уонна М.Т. Шараборин-Кумаров «Дуо Бухатыыр» олоҥхолоруттан быһа тардан толордулар.

Итини сэргэ, Василина Баланова баҕалаах дьоҥҥо олоҥхону үгэскэ олоҕуран толорууга маастар-кылааһы ыытта.