«Арассыыйа» быыстапкаҕа сахалыы сыбаайба ыытылынна
Эдэр ыал – режиссер Владислав Федоров уонна тыйаатыр уонна киинэ артыыската Жанна Ксенофонтова.
Сыанаҕа, Олоҥхо тыйаатыра кыттыылаах, кэргэн тахсар кыыһы былыргы үгэһинэн таҥыннардылар, алгыс тылларын эттилэр. Сиэр-туом толоруутун кэнниттэн эр-ойох буолуу судаарыстыбаннай регистрацията ыытылынна. Үөрүүлээх тэрээһини оһуохай түмүктээтэ.
«Саха сирин олохтоохторо дьиэ кэргэн үгэс буолбут сыаннастарыгар олус ытыктабыллаахтык сыһыаннаһаллар. Дьиэ кэргэн институтун өйөөһүн – Саха сирин сайдыытын биир дьоһун хайысхата. Эдэр ыалы олохторун ураты суолталаах күнүнэн эҕэрдэлиибин, дьолу, өйдөһүүнү уонна этэҥҥэ буолууну баҕарабын», - диэтэ Ил Дархан Айсен Николаев.
«Арассыыйа» Норуоттар икки ардыларынааҕы быыстапка-форум, дойду бэрэсидьиэнэ Владимир Путин сорудаҕынан, 2023 сыл сэтинньи 4 күнүттэн 2024 сыл муус устар 12 күнүгэр диэри ыытыллар. Тэрээһин сүрүн сыала – дойду дьоһун ситиһиилэрин уонна регионнар сайдыыларын үтүө уопутун көрдөрүү.
Сонуннар
Ордук ааҕаллар
