11.09.2020 | 14:21

Арассыыйа-2020 түһүлгэлэригэр

Арассыыйа-2020 түһүлгэлэригэр
Ааптар: Киин Куорат

БОКСАҔА

Василий Егоров 52 кг бастыҥа

Арассыыйа боксаҕа хамаанданан Кубогын киирсиилэрэ Ижевскэйтэн быйыл тэлэбиисэргэ, интэриниэккэ көһүннэ. Олимпиадалары да итинник көрдөрбүттэрин өйдөөбөппүн.

Киин уонна Волга эргиннээҕи федеральнай уокуруктар хамаандалара инники киирсиилэргэ кыайан,  финалга тиийдилэр.  

Бу күрэхтэһиигэ биһиги кимнээҕэр да баар-суох лидербит Василий Егоров тахсарын күүтэбит. Кини урукку улахан кыайыылара – аан дойду үрүҥ көмүс призерун, Европа чемпионун аатын икки төгүл 49 кг ситиспитэ. 52 кг көһөн, былырыын аан дойду чемпионатыгар төһө да хоттордор, Арассыыйа тренердэрэ кытта киниэхэ эрэнэллэр.

Ижевскэйгэ рингэҕэ маҥнайгы бастакы киирсиибитин ыарырҕаппыта. Кэнники аһыллан, утарсааччыларын лаппа баһыйталаата. Финалга  Василийбыт иккис паараҕа аан дойдутааҕы таһымнаах маастар Иван Абрамовы утары киирдэ. Абрамов бу Ижевскэйтэн чугас Башкортостантан кэлбит. Арассыыйа икки төгүллээх призера, уолаттарга Арассыыйа уонна Европа чемпиона буолбуттаах. Биһиги ордук табыгастааҕынан “Матч-боец” ханаалга быһа   көрөргө быһаарынныбыт. Мантан хаһыыбыт тиийэн көмөлөһөөрөй.

Рефери “Бокс!” диэтэҕин ахсын Василий  кимиигэ киирэн истэ.  Утарсааччытыгар холкутатар түгэни биэрбэккэ олус сытыытык, хотоойутук үлэлээтэ. Абрамов олохтоохтор уокуруктарын, ыаллыы өрөспүүбүлүкэлэрин спортсмена буоларынан, бачча улахан бириистээх түһүлгэҕэ саалаҕа киниэхэ ыалдьааччы элбэх буолуохтаах этэ да: “Вася! Вася!” хаһыы  иһиллэр. Спортка итинник олохтоохтор киһилэрэ наһаа баһыйтарар буоллаҕына тылларыттан матааччылар. Биллиилээх спортсменнарга сүгүрүйээччилэрэ, кини маастарыстыбатын астынан, киниэхэ ыалдьар курдук, утарсааччы чугас да дьоно кытта хаһыыга кыттааччылар.  Экраҥҥа субу-субу  Артур Пахомов үөрэнээччитигэр ыалдьан, бэйэтэ  тэҥҥэ боксалаһардыы олоппоһуттан өндөҥнөөн хамсана сылдьан сүбэлиирин көрдөрдүлэр.

Бу киирсиигэ Баһылай 5:0 ахсаанынан кыайда!

Күөнтэһээччитэ – Арассыыйа чемпионун Расул Салиевы эрэллээхтик кыайан, бу түһүлгэҕэ улахан сенсацияны көрдөрбүт  Сибиирдээҕи федеральнай уокурук боксера   Павел Гунченко. Бу уол Баһылайтан биир төбөнөн уһун, эмиэ бэйэтин курдук киирсэр эбит.

Ижевскэйгэ сахаттан сэттэ уол киирсибититтэн бастакынан 49 кг Борис Сидоров (Москва) Арассыыйа чемпиона Эдмонд Худояны (Ураллааҕы федеральнай уокурук) кытта киирсибитэ. Итинник ааттаах утарсааччытын уол толлубакка бастакыттан тиһэххэ диэри, боксаҕа этэллэринии, бастакы нүөмэринэн эрдээхтик үлэлээтэ. Наар кимэн таҕыста. Кыайыыга наһаа дьулуурдааҕын көрдөрдө. Киһитэ куруук куота сылдьан охсуулары оҥортоото. Бу олус  сытыытык барбыт киирсиигэ судьуйалар кыайыыны Худояҥҥа биэрдилэр.

Биһиги көрүүбүтүгэр, Борис киирсиитэ ордук курдук этэ. Ол да гыннар, үтүө санаалары сахта.

Бу күрэхтэһиигэ солбуйааччыта (дублера) суох буолан, сынньаммакка рингэҕэ таҕыста.

Үһүс кыттааччыбыт  эмиэ москвич Назар Андреев 75 кг эмиэ бастакыттан Арассыыйа чемпионун кытта хапсыһыыга үчүгэй өйдөбүлү хаалларда. Андрей Кавальчукка төһө да хоттордор, Сидоровтыын систэрин этэ ситиилэригэр ситиһиилэниэх уолаттар баалларын көрдөрдүлэр. Соҕурууҥҥу уокурук чиэһин көмүскээбит Михаил Прокопьев 49 кг Мухаммад Вахаевка (Хотугу Кавказтааҕы федеральнай уокурук) эмиэ тэҥ киирсиигэ хоттордо.

Назар Андреев – уопуттаах, аан дойдутааҕы кылаастаах спорт маастара Владислав Федюриҥҥа (Приволжскай федеральнай уокурук) түбэспититтэн, салла санаабыппыт. Ол эрээри, бу да сырыыга 19 саастаах уолбут бэйэтин номнуо буспут-хаппыт байыас быһыытынан көрдөрдө. Кини сыыһа-халты туттуута суох наар кимэн таҕыста. Илиитин уларыта сылдьан, уҥатынан да, хаҥаһынан даҕаны күүстээх охсуулары оҥортоото. Быһата, ааттаах-суоллаах утарсааччытыттан куттаммакка, эрэллээхтик кииристэ. Киниэхэ Василий Лисица тренер быһыытынан арыаллаата, тохтобулга наадалаах сүбэлэри-амалары биэрдэ. Икки бастакы рауннарга баһыйда, оттон үһүскэ кыратык кимиитин намтата сырытта. Ол да буоллар, судьуйалар сиэрдээх быһаарыыларынан кыайыыны Назар Андреев ситистэ.

Мин бассаабынан Саха өрөспүүбүлүкэтин хамаандатын салайааччытыгар, Арассыыйа үтүөлээх тренеригэр  Артур Иннокентьевич Пахомовка барыларыгар эҕэрдэ ыыттым. Уонна нум-нам буоллаҕына, комментарийдыырыгар  суруйдум. Тохтуу түһэн баран аудионан илэ бэйэтин куолаһа бу кэллэ. Махтанна: “Ижевскэйгэ сэттэ күннээх сыралаах күрэхтэһии түмүктэннэ. Маннык улахан түһүлгэҕэ сүбэлэһэн биэс регионтан сэттэ уолбутун киллэрбиппит. Аҥаардас бу даҕаны улахан ситиһии. Уолаттар бары дьоһуннук кииристилэр. Манна бэлэмнэнэргэ, кэлэрбитигэр-барарбытыгар көмөлөспүт, спортивнай бэлэмнэнии Киинин салайааччыларыгар Леонид Николаевич Спиридоновка, Михаил Дмитриевич Пахомовка барыларыгар улахан махтал! Василий 52 кг балайда адаптацияланан эрэр диэххэ наада. Арассыыйа кылаабынай тренерэ элбэхтик киирсиэ этэ диэн, кинини уонна миигин Киин уокурук хамаандатыгар ыҥырбыта. Илин Уһуктан киирбиппит буоллар, маҥнайгы эргииринэн туораан хаалыа эбиппит. Уол үстэ кыайда, бастакытыгар ыарахан этэ, судьуйалар арахсыылара 3:2 буолбута. Илиитэ өссө да түөрэҥкэй соҕус, көмүскэниини  бөҕөргөтүүгэ болҕомто ууруохпут. 

Былчыҥын эбэргэ икки сылы быһа дьаныардаахтык  үлэлээтибит. Карантин кэмигэр эбэ сатаатыбыт, билигин ыйааһына 56 буолла. 3-4 киилэни үрэр. Бу ыйааһыҥҥа оруобуна  сөптөөх дии саныыбын. Былаан элбэх. Сочига олимпийскай бэлэмнэнии саҕаланар. Кылаабынай тренер этэринэн, Василий алтынньы бүтүүтүгэр  Испанияҕа эбэтэр Турцияҕа аан дойдутааҕы турнирга барыаҕа. Арассыыйа чемпионата Оренбурга сэтинньи 27 күнүттэн ахсынньы 6 күнүгэр диэри ыытыллыаҕа. Онно хайдах буоларын рингэ көрдөрүө. Уйбаан, олимпийскай лицензияны ыйыппыккын. Онно күөһү эрдэ өрүнүмүөххэ”.

Ижевскэй түһүлгэтин сабыллыытыгар Василий Егоровтаах хамаандалара иккис буолбутунан, бары үрүҥ көмүс мэтээли кэттилэр уонна биэс мөлүйүөн солкуобайдаах бириистэн бэйэлэрин өлүүлэрин ыллылар. Күрэхтэһии 15 мөлүйүөннээх бирииһин пуондатыттан бастаабыттар сэттэ, үһүс буолбуттар үс мөлүйүөнү үллэһиннилэр.

Сонуннар

Ордук ааҕаллар

«Sakhalifting» тардынааччылара сөхтөрөллөр
Спорт | 14.01.2022 | 20:42
«Sakhalifting» тардынааччылара сөхтөрөллөр
Ханна да тиийдэххэ, физкультуранан уонна спордунан утумнаахтык дьарыктанааччылар бааллар.  Хамсык ыарыы өрө турбут кэмигэр дьарыктанааччылар ахсааннара эбиллэ турара үөрдэр. Онлайн ситимин нөҥүө көхтөөхтүк дьарыктыыллар. Балтараа сыллааҕыта тэриллибит “Финанс” РИК гендириэктэрэ Дмитрий Захаров салайааччылаах “Sakhalifting”-турникка тардыныы бассаап-бөлөх ааспыт сылы дьоһуннук түмүктээтэ. Кэккэлэрэ да хаҥаан иһэр, көрдөрүүлэр да тупсаллар. 13 саастаах оҕотуттан...
«Инникигэ хардыы» конференцияҕа Дьокуускайтан 263 үөрэнээччи кыттар
Сонуннар | 11.01.2022 | 12:00
«Инникигэ хардыы» конференцияҕа Дьокуускайтан 263 үөрэнээччи кыттар
Тохсунньу 8 күнүгэр «Шаг в будущее» – «Инникигэ хардыы» XXVI өрөспүүбүлүкэтээҕи научнай конференция үөрүүлээхтик арылынна. Манна 34 оройуонтан 1 700 тахса үөрэнээччи бэйэлэрин научнай-чинчийэр  үлэлэрин түмүгүн билиһиннэрэллэр.  «Шаг в будущее» – «Инникигэ хардыы» XXVI өрөспүүбүлүкэтээҕи научнай конференция куораттааҕы түһүмэҕэр 2021 сыл сэтинньи 10 күнүттэн ахсынньы 16 күнүгэр диэри дистанционнай форматынан...
Дьокуускай салалтата крематорий тутуутун көҥүллээтэ
Сонуннар | 11.01.2022 | 16:00
Дьокуускай салалтата крематорий тутуутун көҥүллээтэ
Олохтоох дьаһалта «Быдан Эргиир» ХЭТ киин куоракка колумбарийдаах крематорий тутарыгар көҥүлү биэрдэ. Ити туһунан куорат баһылыгын нэдиэлэтээҕи планеркатыгар этиллиннэ диэн иһитиннэрдэ  Олохтоох дьаһалта пресс-сулууспата.  Куораты тутууга уонна тырааныспар инфраструктуратыгар Департамент информациятынан, 2021 сыл кулун тутар ыйыгар «Национальная мемориальная компания» ХЭТ диэн Арассыыйа территориятыгар кремациялыыр комплекстары тутуу операторыттан коммерческай этии киирбит....
Люба Готовцева:  «Киһи биир сиргэ тэпсэҥнии туруо суохтаах»
Дьон | 14.01.2022 | 20:54
Люба Готовцева: «Киһи биир сиргэ тэпсэҥнии туруо суохтаах»
Киһи олорорун тухары төһөлөөх элбэх киһини кытта билсэрэ, алтыһан ааһара буолуой?! Оттон суруналыыс буоллаххына, өссө элбэх киһини кытта көрсөҕүн, кэпсэтэҕин. Олоххор алтыспыт дьоҥҥун аны туран барыларын кытта сибээс туппаккын, ол эрэн искэр киллэрэн, олус үчүгэйдик саныы сылдьаҕын. Мин Любалыын, таптаан ааттыырбынан Любушкалыын, 2000 сыллар саҥаларыгар билсибитим. Онтон ыла хайдах эрэ...