Аныгы оҕолор оонньоон харчылаһаллар

Ыскаап сирэйин миэлинэн ойуулаан учуутал буолбут, куукуланы укуоллаан быраас идэтин талбыт киһи элбэх. Оттон аныгы үйэ оҕолоро кэнэҕэски идэрин компьютерынан оонньоон быһаарыналлар. Сорохтор номнуо дохуот киллэринэллэр.

Дьокуускай куораттааҕы 12-с №-дээх оскуола 9 «Б» физиканы уонна математиканы дириҥэтэн үөрэтэр хайысхалаах кылааһын бүтэрэн, быйыл Өрөспүүбүлүкэтээҕи лиссиэй техническай кылааһыгар туттарсан киирдэ.

Андрей – бэйэтин саастыылаахтарыгар холобур буолар ыччат. Ол курдук, IT-технологияны үөрэтэн, бырагыраама суруйар, сайт оҥорор, төлөпүөн сыһыарыыларын, оонньууларын оҥорорго холонор. Маны таһынан, Сахабыт сирин устун экспедицияларга сылдьар. Соторутааҕыта Дьокуускай-Мииринэй хайысханан икки нэдиэлэ айаннаан кэллэ.

Тоҕо мин IT-ны таллым?

• Билиҥҥи кэмҥэ киһини компьютер, технология солбуйда. Ол иһин мин IT-ны интэриэһиргээбитим ыраатта. Ордук программирование, дизайн салаатын сэҥээрэбин. Иллэҥ бириэмэбэр оонньуу оҥоробун, сайт оҥорорго холонобун. Аҕыйах сылынан Сахабыт сирэ IT-нан эрэ хамсанар буолуо диэҥҥэ итэҕэйэбин.

Туохтан саҕаламмытай?

• Саамай математика уонна информатика уруоктарын сөбүлүүбүн. Үс сыл аннараа өттүгэр, төрөппүттэрим «IT-нан дьарыктаныаххын баҕараҕын дуо?” диэбиттэрэ. Тутатына: «Боруобалаан көрүөххэ сөп”, – диэбитим. Ол курдук Алексей Илларионов IT-оскуолатыгар киирэн, икки сыл үөрэммитим. Манна сылдьан хакатоннарга, семинардарга, куонкурустарга кыттыбытым. 2017 с. оскуола оҕолоругар ыытыллар «Моя профессия IT» диэн хакатоҥҥа кыттан, Далан Лугинов диэн бииргэ үөрэнэр уолбунаан үһүс миэстэни ылбыппыт. Биһиги бырайыакпыт SaveGuard диэн ааттаах. Сүрүн идиэйэтэ: аан дойдуга тыһыынчанан оҕо сүтэр. Ол кыһалҕаны быһаарар мобильнай сыһыарыыны оҥорбуппут. Холобура, оҕо бастаан хантан ханна барыахтааҕын суруйар. Сыһыарыы төрөппүттэри кытта сибээстиир. Төрөппүт оҕото ханна баран, айаннаан иһэрин сыһыарыы каартатыгар көрөр. Кэмиттэн кэмигэр сыһыарыы: “Туругуҥ хайдаҕый?” – диэн ыйытар. Дьүүллүүр сүбэ үлэбитин хайҕаабыта, онтон сиэттэрэн быйыл эмиэ бу күрэххэ кыттан, бастакы миэстэни ылбыппыт. 45 тыһыынча солк. наҕараадаламмыппыт.

Наар компьютерга олоробун дуо?

• Иллэҥ кэммэр доҕотторбун кытта баскетболн, волейбол оонньуубун. Төрөппүттэрбин кытта айылҕаҕа, сибиэһэй салгыҥҥа сылдьарбын сөбүлүүбүн.

Эһиэхэ тугу сүбэлиибин?

• Habr.com диэн саайтка киирэн, элбэх саҥа инфорцияны билиэххэ сөп. Уопсайынан, айтишник логическай өйө сайдыбыт буолуохтаах. Онно саахымат, дуобат сүрдээҕин көмөлөһөр. Уонна, биллэн турар, үчүгэй иҥэмтиэлээх ас. 

Төрөппүт санаата

Ольга Васильевна Торговкина, Андрей ийэтэ:Айти технология билиҥҥи кэм ирдэбилэ буолла дии саныыбыт. Биһиги оҕобут кыра сааһыттан IT-га сыстан улааппыта, кэлин манта көмөлөһүө дии саныыбын. Оҕобут ситииһиилэринэн киэн туттабыт эрэ.