Аныгы искусство бастакы бэстибээлэ ыытыллар

2022 сыл бэс ыйын 2-8 күннэригэр Дьокуускайга аан бастакы төгүлүн «Территория. Якутск» аныгы искусство бастакы бэстибээлэ ыытыллар. Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
Киэҥ далааһыннаах тэрээһин Сибиир уонна Уһук Илиҥҥи регионнар култуурунай олохторун сайыннарыыга туһуламмыт. Бэстибээл Саха АССР төрүттэммитэ  100 сылын чэрчитинэн ыытыллар. 
«Территория. Якутск» — «Территория» аныгы искусство Норуоттар икки ардыларынааҕы бэстибээл-оскуолаларын, Москватааҕы аныгы искусство музейын (ММОМА) уонна «Полюс» Арассыыйатааҕы көмүһү хостуур бөдөҥ хампаанньа кыттыгас бырыайыактара. Тэрийээччилэр иһитиннэрбиттэринэн, бырайыак Арассыыйа Федерациятын бэрэсидьиэнэ Владимир Путин гыраанын көмөтүнэн олоххо киирэр. 
Бэстибээл чэрчитинэн көрөөччү дьүүлүгэр испэктээкиллэр тахсыахтара, сыана маастардара кыттыылаах маастар-кылаастар ыытыллыахтара. 
Тэрээһин РФ норуодунай артыыската Евгения Добровольская, РФ үтүөлээх артыыһа Сергей Чонишвили, Полина Осетинская уонна Елена Ревич кыттыылаах муусука уонна поэзия киэһэтинэн арыллыаҕа. Көрүү «Территория» бэстибээл арт-дириэктэрэ, РФ үтүөлээх артыыската Юлия Пересильд кыттыылаах «Эбеновая кожа» мусукаалынай испэктээкилинэн түмүктэниэҕэ. 
Бэстибээл бырагырааматыгар сүрүн миэстэни «Полюс. Золотой сезон» регионнааҕы театральнай кэлэктииптэр сэттис куонкурустарын кыайыылаах испэктээкиллэрэ ылыахтара. Ол курдук, Шарыпово куорат драматическай театра «Буратино», Мииринэйдээҕи театр «Озор» испэктээкиллэри, Саха сиринээҕи Үүнэр көлүөнэ театра бэйэтин сыанатыгар «Полюс. Золотой Сезон» куонкуруһун кыайыылаҕынан буолбут «Хроника безумия…» туруотуутун көрдөрүөхтэрэ. 
Бэс ыйын 4-7 күннэригэр 2021 сыллаахха «Кульминация» драматургия куонкуруһун экспертэрэ сүүмэрдээбит аныгы бастыҥ пьесаларын ааҕыыта буолуоҕа. Ааҕыы П.А. Ойуунускай аатынан Саха академическай театрыгар ыытыллыаҕа (ааҕыы куратора – Роман Дорофеев).
Идэлээх бырагыраама чэрчитинэн РФ норуодунай артыыһа, режиссер Андрей Борисов лиэксийэлэрэ уонна маастар-кылаастара ыытыллыахтара.
Бэстибээл бырагырааматыгар оҕолорго уонна төрөппүттэргэ аналлаах икки мусукаалынай маастар-кылаас киирдэ: Полина Осетинская (фортепиано) уонна Елена Ревич (скрипка), итиэннэ «Трикстер» театр  маастар-кылааһа. 
Итини сэргэ бэс ыйын 4 күнүттэн от ыйын 17 күнүгэр диэри Саха Өрөспүүбүлүкэтин Национальнай художественнай музейыгар Москватааҕы аныгы искусство музейын «Человек и его ландшафты» быыстапката үлэлиэҕэ.