Анал байыаннай дьайыы кыттыылаахтарыттан хомунаалынай өҥө биэнньэтиттэн босхолуур сайаапкалары ылаллар

Саха сиригэр анал байыаннай дьайыы кыттыылаахтарыттан хомунаалынай өҥө биэнньэтиттэн уонна хапытаалынай өрөмүөн усунуоһуттан босхолуур сайаапкалары ылаллар.

СӨ Бырабыыталыстыбатын Бэрэссэдээтэлэ Георгий Степанов алтынньы 7 күнүгэр брифиҥҥэ эппитинэн, маннык өйөбүлүнэн байыастар сулууспалыыр кэмнэригэр туһаныахтарын сөп. 
«Хомунаалынай өҥө иһин төлөбүргэ иэстээхтэр биэнньэттэн босхолуур туһунан сайабылыанньаны өҥөнөн хааччыйар тэрилтэлэргэ, салайар хампаанньаларга эбэтэр дьиэни бас билээччилэр табаарыстыбаларыгар, региональнай операторга түһэрэллэр, хапытаалынай өрөмүөн усунуоһугар иэс иһин биэнньэттэн босхолонорго – элбэх кыбартыыралаах дьиэ хапытаалынай өрөмүөнүн пуондатыгар», – диэн быһаарар Георгий Степанов.
Вице-премьер иһитиннэрбитинэн, Саха Өрөспүүбүлүкэтигэр бүгүҥҥү күҥҥэ гаас киллэртэриитигэр материальнай көмө анал байыаннай дьайыы кыттыылаахтарын 141 дьиэ кэргэнигэр оҥоһуллубут, 448 байыас төрөппүтэ санаторнай-курортнай эмтэниини ааспыт. 342 киһи байыас эмтэнэр сиригэр айанныырга дьонугар материальнай көмө оҥоһуллубут, 270 киһи дьиэтигэр уонна тэйиччиттэн социальнай өҥөнөн туһаммыт. Анал байыаннай дьайыы кыттыылааҕа 847 киһи уонна 1542 кинилэр дьиэ кэргэттэрин чилиэннэрэ реабилитацияны ааспыт. 
Дьарыктаах буолуу кииннэригэр 555 сайабылыанньа киирбититтэн 127 киһи анал үөрэххэ ыытыллыбыт, 340 киһи үлэнэн хааччыллыбыт. Ол туһунан Ил Дархан уонна Бырабыыталыстыба пресс-сулууспата иһитиннэрэр.