АГИКИ үөрэххэ туттарсааччыларга аһаҕас эфири ыытыаҕа

Бүгүн, ыам ыйын 28  күнүгэр, күнүс 15 чаастан Арктикатааҕы судаарыстыбаннай култуура уонна искусство института инстаграмҥа официальнай сирэйигэр 2021 сылга үөрэххэ ылыы хампаанньатын туһунан түмүктүүр аһаҕас эфири ыытар. Бу иннинэ ыам ыйын 18 күнүттэн саҕалаан аһаҕас эфирдэр тахсыбыттара. 
Аһаҕас эфиргэ ректор Саргылана Игнатьева уонна үөрэххэ киирэр хамыыһыйа сэкирэтээрэ Татьяна Петрова кыттыыны ылыахтара. 

«Өрөспүүбүлүкэҕэ биир да култуурунай-маассабай тэрээһин биһигинэ суох барбат. Региональнай эрэ буолбакка, аан дойду таһымыгар эмиэ кыттабыт.  Ити хас биирдии АГИКИ устудьуонун уонна выпускнигын инники идэлээх олоҕор сүҥкэн оруолу оонньуур, баай уопуту биэрэр», – диир Саргылана Игнатьева.
Ректор этэринэн, быйыл АГИКИ үрдүк таһымнаах специалистары бэлэмниир хайысхатын кэҥэппит. Ол курдук, үрдүк технологиялары баһылаабыт ыччат цифровой дизайнтан саҕалаан, музейга, библиотекаҕа үлэлииргэ үөрэниэхтэрэ. Үөрэх кыһатыгар барыта 23 үөрэтэр бырагыраама үлэлиир, онно 460 устудьуон киирэрэ былааннанар. 
Бүгүҥҥү аһаҕас эфиргэ  Арктикатааҕы судаарыстыбаннай култуура уонна искусство институтугар хайдах киириэххэ сөбүн ыйыталаһыаххытын, Уһук Илиҥҥи үөрэх кыһаларын эмиэ билсиэххитин сөп.
Үөрэххэ киирэр хамыыһыйа төлөпүөнэ: +7 (4112) 42-11-67.