«Аэрофлот» 2023 сыллааҕы субсидиялаах билиэттэри атыылаан эрэр

Субсидияламмыт хайысхалар ортолоругар Дьокуускай – Москва маршрут баар. «Анал тарифтар «Аэрофлот» уонна «Россия» авиахампаанньалар быһа рейстэригэр бааллар, итини сэргэ «Аврора» авиахампаанньа SU кодтаах рейсэтигэр», - диэн иһитиннэрдилэр авиахампаанньа сайтыгар.

Чэпчэтиилээх тарифтар 2023 сыл бэс ыйын 2 күнүттэн балаҕан ыйын 18 күнүгэр диэри Уһук Илиҥҥи федеральнай уокуруктан дойду киин куоратыгар диэри быһа рейстэргэ көрүллэллэр.

Субсидиялаах билиэттэр сыаналара: Дьокуускай – Москва хайысхатынан Уһук Илиҥҥи федеральнай уокурук олохтоохторугар 9200 солкуобай, чэпчэтиилээх категория гражданнарга – 7000 солкуобай, 2-12 саастаах оҕолорго – 5250 солкуобай.

Субсидиялаах айан бырагырааматынан чэпчэтиилээх категория гражданнара – 23 сааһыгар диэри, эр дьон – 60 сааһыттан үөһэ, дьахталлар – 55 сааһыттан үөһэ, инбэлииттэр уонна элбэх оҕолоох ыал чилиэннэрэ экономическай кылаастаах билиэти ылыахтарын сөп.