Адаптивнай спорт сөҕүмэр ситиһиилэрдээх

Доруобуйаларыгар хааччахтаах спортсменнарга оҕунан ытааччы Виктор Скрыбыкин Арассыыйа чөмпүйүөнэ буолла. 
Адлерга буолан ааспыт чэпчэки атлетикаҕа Арассыыйа чемпионатыгар сүһүөхтэринэн хааччахтаах спортсменнар тоҕус мэтээли ыллылар. Дьаадыраны анньыыга Айаал Сивцев Арассыыйа чөмпүйүөнэ буолла уонна рекорд олохтоото. Василина Иванова, Виктория Петрова эмиэ бастаатылар. Яков Максимов дьаадыраны анньыыга, Никифор Анисимов диискэни быраҕыыга бириистээх миэстэлэргэ тигистилэр. Адаптивнай спорт спортсменнарын тренердэр Петр Давыдов уонна Василий Оленов дьарыктыыллар. Олорон эрэ волейболга Арассыыйа устудьуоннарын бэстибээлигэр эр дьон – кыһыл көмүс,  дьахталлар боруонса мэтээллэри ылаттаатылар. Волейболистар тренердэрэ — Константин Гаврильев.
Адаптивнай спорт саҥа дириэктэринэн Амма спортоскуолатыгар дириэктэрдээн баран бу кииҥҥэ дириэктэри солбуйааччынан үлэлээбит Ньургун Валерьевич Иванов ананна. Бу иннинэ уонча сыл киини салайбыт Анастасия Михайлова дириэктэри солбуйааччынан үлэлиэҕэ.