Абитуриент-2021: магистратураҕа докумуоннары тутуу болдьоҕо түмүктэнэрэ чугаһаата

Хотугулуу-Илиҥҥи федеральнай университет магистратураҕа киириэн баҕалаахтартан докумуоннары атырдьах ыйын 10 күнүгэр диэри тутар. Ол туһунан ХИФУ пресс-сулууспата иһитиннэрэр.
Быйыл магистратура бырагырааматынан 674 бүддьүөт миэстэтэ көрүллүбүт. Итинтэн 541-рэ – күнүскү пуорманан үөрэххэ. 
Абитуриеннартан пааспар, үрдүк үөрэх туһунан диплом, СНИЛС (баар буоллаҕына) тус кэбиниэккэ угуллар цифровой хаартыска ирдэнэр. 
2021 сылга ХИФУ магистратураҕа 90 бырагыраамалаах. Олор истэригэр 4 саҥа хайысха баар: «Туризм» (Аан дойдутааҕы туризм уонна бизнес-технологиялар), «Инноватика» (цифровой экономика усулуобуйаларыгар нновациялары салайыы), «Судаарыстыбаннай уонна муниципальнай салайыы» (Цифровой куорат), «Юриспруденция» (Предпринимательскай быраап. Корпоративнай быраап. Конкурентнай быраап).
Атырдьах ыйын 11-20 күннэригэр магистратураҕа киириэн баҕалаахтар тургутугу ааһаллар. Эксээмэннэр онлайн көрүҥүнэн ыытыллыахтара. Бүддьүөт миэстэлэрин сэргэ 414 төлөбүрдээх миэстэ баар. 
Магистратура «Общественное здравоохранение» бырагырааматын салайааччыта, медицинскэй наука доктора Надежда Саввина эппитинэн, үөрэхтэрин бүтэрэллэригэр үс диплому ылаллар:  функциональнай диетология консультана,  олох майгытын модификациятын консультана уонна уопсастыбаннай доруобуйа харыстабылын магистра.
Саха сиригэр 2021 сылтан доруобуйа Уон сыла биллэриллибитинэн, доруобуйа харыстабылын менеджердэрэ наадалара бэлиэтэннэ.  Бырагыраама доруобуйаны бөҕөргөтөр, сөптөөх аһааһыҥҥа үлэлиэн уонна НКО-ны салайыан баҕарар дьону үөрэтэр. Манна атын да идэлээх, медицинаттан ыраах дьон үөрэниэхтэрин сөп эбит.