Ааспыт сууккаҕа коронавируһунан 100 киһи эбии ыарыйда

Саха сиригэр ааспыт суукка түмүгүнэн коронавирус дьаҥынан ыалдьыы 100 түбэлтэтэ регистрацияламмыт. 
Коронавируһу утары охсуһар өрөспүүбүлүкэтээҕи суһал штаб бэрэссэдээтэлин солбуйааччы Ольга Балабкина бүгүҥҥү брифиҥҥэ эппитинэн, 100 киһиттэн 64-дэ Дьокуускай куоракка диэн тоһоҕолоон бэлиэтээтэ. 

8 түбэлтэ Мэҥэ Хаҥалас улууһугар, 6 – Аммаҕа, 4 – Бүлүүгэ баара билиннэ. Үөһээ Дьааҥы, Мииринэй, Уус Алдан оройуоннарыгар үстүү, Горнай уонна Чурапчы улуустарыгар ыарыы иккилии түбэлтэтэ баар.
Аллайыаха, Кэбээйи, Ньурба, Сунтаар уонна Хаҥалас улуустарыгар биирдии киһи ыалдьыбыт. 
«Ыалдьыбыт дьон бары амбулаторнай уонна стационарнай көрүҥүнэн эмтэнэллэр. Ыарыы ыараханнык ааһар буолан, стационарга киирэр киһи ахсаана элбээтэ», - диир Ольга Балабкина.