Ааспыт нэдиэлэҕэ 46 дьэллик ыт тутулунна

Территориялары кытта үлэлиир департамент начаалынньыга Владислав Слепцов бэлиэтээбитинэн, 2023 сыл саҕаланыаҕыттан 533 ыт тутуллан кыыллар приюттарыгар киллэрилиннэ.  

«Дьэллик кыыллары тутуунан дьарыктанар штаб күн аайы үлэлиир, Биир кэлим диспетчерскэй сулууспаҕа, Дьокуускайдааҕы Салалта муниципальнай киинигэр уонна социальнай ситимнэр нөҥүө киирбит сайаапкаларынан дьарыктанабыт. Бүгүҥҥү күҥҥэ Кыыллар приюттарыгар 1295 ыт баар», - диэн иһитиннэрдэ Владислав Слепцов.

Манна даҕатан эттэххэ, күн аайы дьэллик кыыллары тутуунан «Помоги выжить» аһымал пуондатын икки биригээдэтэ, Дьэллик кыыллары тутуу сулууспатын үс биригээдэтэ, «ИП Огонеров» икки биригээдэтэ дьарыктаналлар.

Өрөспүүбүлүкэ территориятыгар дьиэ кыылларын иитии быраабылаларын кэһии иһин, 2014 сыл атырдьах ыйын 1 күнүнээҕи 237 №-дээх СӨ бырабыыталыстыбатын уурааҕар олоҕуран, гражданнар бастакы сырыыга 1000-1500 солкуобай, хаттаан кэһиигэ 3000-5000 солкуобай ыстарааптаах административнай эппиэтинэскэ тардыллаллар. Боротокуолу СӨ Ветеринарияҕа департаменын территориальнай салааларын судаарыстыбаннай инспектордара толороллор.

Биир кэлим диспетчерскэй сулууспа нүөмэрэ: 44-42-51.