Аармыйаҕа күһүҥҥү хомуур

Аармыйаҕа 18-тан 27-гэр диэри саастаах эр дьон ыҥырыллар. Контракт быһыытынан сулууспалааччыларга быһа холоон 17 400-тэн 60 000 солк. тиийэ хамнас төлөнөр.

Күһүҥҥү ыҥырыы

Күһүҥҥү хомуур болдьоҕо алтынньы 1 күнүттэн ахсынньы 31 күнүгэр диэри салҕанар. Уһук хоту сир территорияларыгар сэтинньи 1 күнүттэн ахсынньы 31 күнүгэр диэри ыҥыраллар.

Сулууспа болдьоҕо

Аармыйаҕа сулууспалыыр болдьох 1 сыл буолар. Бу болдьоххо 2008 сылтан туох да уларыйыы суох.

Военкомат медхамыыһыйата

Хас биирдии призывник медицинскэй бэрэбиэркэни барыан иннинэ ФЛГ-га түспүт уонна уопсай анализтарын туттарбыт буолуохтаах. Сорох түбэлтэҕэ эбии диагностическай чинчийиилэр бараллара ирдэнэр.

Медицинскэй бэрэбиэркэҕэ ханнык быраастар көрөллөрүй?

Хирург, терапевт, невролог, психиатр, офтальмолог, оториноларинголог, стоматолог уонна дерматовенеролог быраастар.

Байыаннай сулууспаҕа сөп түбэһэр категория

А – байыаннай сулууспалыыр кыахтаах.

Б – кыра хааччахтардаах. Бу категорияҕа эһигини сулууспаҕа ыҥыраллар эрээри, физическэй эрчиллиилэри толорууга сорох хайысхаларын чэпчэтэллэр.

В – бу категория призывниктара сэрии буолар түгэнигэр эрэ сулууспаҕа ыҥырыллаллар.

Г – быстах кэмҥэ байыаннай сулууспаттан босхолонор.

Д – байыаннай сулууспаттан босхолонор.

Быйыл Саха сириттэн байыаннай сулууспаҕа 1000-тан тахса эдэр киһи барара былааннанар. Военкоматтарга барытыгар санитарнай-эпидемиологическай нуормалары тутуһуу кытаанахтык хонтуруолланар.

 Аармыйаҕа сулууспалыы барыахтарын баҕарар ыччаттар Саха сирин байыаннай комиссариатыгар эрийэн билсиэххитин сөп: 23-42-31, Дьокуускай куорат байыаннай комиссариата – 36-51-67.