Аҕыс саҥа эбийиэк тутуллар

2022 сыл тохсунньу саҕаланыаҕыттан СӨ тутууга уонна олорор дьиэҕэ судаарыстыбаннай надзорун Управлениетыгар  өрөспүүбүлүкэҕэ аҕыс саҥа эбийиэк тутуллан эрэрин туһунан иһитиннэрбиттэр. Кинилэр истэригэр дьиэни уларытан, тупсаран тутуу, оскуолаҕа самалык тутуу, балыыһа комплекса, ууну бэлэмниир станциялаах водозабор уонна элбэх кыбартыыралаах түөрт дьиэ киирэллэр.
Ол курдук, Дьокуускай куоракка уонна Маҕанныыр суол 2 килэмиэтиригэр 2201,8 кв. миэтирэ уопсай иэннээх үс мэндиэмэннээх дьиэ уопсастыбаннай баанньыкка уларыйыа. Пригороднай сэлиэнньэтигэр Совхознай уулусса, 17, 12 №-дээх оскуолаҕа 5280,2 кв. миэтирэ иэннээх үс этээстээх самалык тутуу баар буолуо. Бу тэрилтэҕэ эбии 326 миэстэ тахсыа. Оскуола саҥа куорпуһугар үөрэнэр кылаастары уонна кабинеттары таһынан, 160 миэстэлээх остолобуой, 300 миэстэҕэ эстрадалаах аактабай саала, душтардаах спортивнай саала, музыкальнай уонна көстүүм уларыттар-тэлэриттэр үҥкүүлүүр саалалар баар буолуохтара.
Дьокуускайга элбэх кыбартыыралаах олорор дьиэни тутууга бэлэмнэнии үлэтэ саҕаланна – тоҕус мэндиэмэннээх офистардаах 4245, 3 кв. миэтирэ иэннээх Краснояров уулуссатыгар 117 кыбаарталга уонна былааҥҥа киирбит үс дьиэттэн “Атмосфера” комплекска Бүлүүлүүр суол 5 килэмиэтиригэр, 112 кыбаарталга. 9817,7 кв. миэтирэ иэннээх, 105 кыбартыыралаах 16 мэндиэмэннээх дьиэҕэ гараас, фитнес саала уонна да атын тэрилтэлэр баар буолуохтара. 
Дьону хаарбах уонна сууллаары турар дьиэлэртэн көһөрүү бырагыраама иитинэн Таатта улууһугар Боробулга уонна Анаабыр улууһугар Сааскылаахха элбэх кыбартыыралаах дьиэлэр тутуллалларын туһунан эттилэр. Сунтаар улууһун Сунтаар сэлиэнньэтигэр водозабор уонна ууну бэлэмниир станция тутуллуохтара. 
Маны таһынан Уус Майа оройуонун Уус Майа бөһүөлэгэр үс мэндиэмэннээх аныгылыы балыыһа комплекса тутуута саҕаланыа. Манна биир симиэнэҕэ 104 киһи көрдөрүнэр, 45 куойкалаах сытар сирдээх, медицинэ бары салаата, сэллик диспансера, гараас уонна да атын балыыһа сулууспалара баар буолуохтара.