76 киһи коронавирустаата

Ил Дархан Айсен Николаев бүгүн, бэс ыйын 12 күнүгэр брифинг кэмигэр иһитиннэрбитинэн, ааспыт сууккаҕа Саха сиригэр эбии 76 киһи коронавируһунан ыалдьыбыта бигэргэннэ.

54 саҥа түбэлтэ Дьокуускайга бэлиэтэннэ, Миирнэйгэ — 9, Ньурбаҕа — 6, Горнайга — 3, Алдаҥҥа — 2, Нерюнгригэ уонна Хаҥаласка — биирдии. Ыалдьыбыт дьону балыһааҕа киллэрии, алтыспыт дьоннорун быһаарыы уонна изоляциялааһын үлэлэрэ ыытыллаллар.

Бу кэм устата өрөспүүбүлүкэ үрдүнэн уопсайа 2898 коронавируһунан ыалдьыы түбэлтэтэ бэлиэтэннэ, 1661 киһи үтүөрдэ, 20 киһи суорума суолланна.