7-с оскуола оркестрын ситиһиитэ

Бу күннэргэ Дьокуускайга “Саһарҕа хоптото”  II-с Норуоттар икки ардыларынааҕы күрэх буолан ааста. Быйылгы күрэх хаһааҥҥытааҕар да элбэх кыттааччыны муста. Саха сирин 25 улууһуттан, Арассыыйа 18 куоратыттан, Монголияттан уонна Кытайтан 1302 оҕо кыттыыны ылла.

Муусука бэстибээлэ "Муусука бука барыбытыгар” диэн тохсус сылын үлэлиир бырайыак чэрчитинэн ыытыллар. Бу бырайыакка өрөспүүбүлүкэ оскуолата, уһуйаана барыта хабыллар. Оҕолор муусука уруоктарыгар араас хайысханан сайдаллар.

Дьокуускай 7-с нүөмэрдээх оскуолатын С.И. Мегина салайааччылаах инструментальнай оркестра 3-с истиэпэннээх лауреат аатын ылан үөрүүлэрэ үксээтэ. Идэтийбит муусука уонна искусство оскуолаларын таһымыгар көннөрү орто оскуола оҕолоро музыкальнай инструменнары баһылаабыттара, маннык үрдүк таһымнаах күрэххэ ситиһиилээхтик кыттыбыттара ордук хайҕаллаах.