500 мөл. солкуобайы Саха сирэ 2024 сылга элбэх оҕолоохтору дьиэнэн хааччыйыыга тыырда

2024 сылга өрөспүүбүлүкэ бүддьүөтүттэн 500 мөл. солк. элбэх оҕолоох 119 ыалы олорор дьиэнэн хааччыйыыга тыырда, диэн иһитиннэрэр тутуу министиэристибэтэ. 

Дойду баһылыга Владимир Путин элбэх оҕолоох ыал Арассыыйаҕа үгэс буолбут көстүү буолуохтааҕын, уопсастыба онно дьулуһуохтааҕын туһунан соругу туруорбута. Үс, түөрт уонна онтон элбэх оҕолоох дьиэ кэргэн үрдүктүк тутуллар, судаарыстыба кинини өйүөхтээх.
2012 - 2023 сылларга Саха сиригэр 600 элбэх оҕолоох дьиэ кэргэн олорор усулуобуйатын тупсарынна. Онуоха олохтоох бэйэни салайыныы уорганнара 1 700,4 га иэннээх 13 222 сир учаастагын биэрэн тураллар.
Онтон 8 381 учаастак уотунан, 4 260 учаастак гааһынан хааччыллыылаах. Судаарыстыба бүддьүөтүттэн бу сыалга 2024 сылга 352,7 мөл. солк. көрүлүннэ, 2025 сылга – 247,2 мөл. солк. былааннанар.

2025 сыл бүтүөр диэри 929 учаастакка уот тардар, 785 учаастакка күөх төлөнү киллэрэр, 54 учаастакка ититии боппуруоһун быһаарар сорук турар.
Санатар буоллахха, Ил Дархан Айсен Николаев быйыл муус устар 26 күнүгэр Саха Өрөспүүбүлүкэтигэр элбэх оҕолоох дьиэ кэргэннэргэ социальнай өйөбүл эбии миэрэлэрин туһунан ыйааҕы таһаарбыта, диэн иһитиннэрэр Ил Дархан уонна Бырабыыталыстыба пресс-сулууспата.