5-8 кылаас үөрэнээччилэригэр дистанционнай үөрэх салҕанар

Куораттааҕы санитарнай-эпидемиологическэй хамыыһыйа быһаарыытынан, 5-8 кылаас үөрэнээччилэрэ дистанционнай көрүҥүнэн салҕыы үөрэнэллэр. 1-4 уонна 9-11 (12) кылаастар санитарнай ирдэбиллэри тутуһан урукку курдук, олоҕурбут көрүҥүнэн үөрэнэллэр. 
СӨ Роспотребнадзор Управлениетын санитарнай кэтээн көрүүгэ уонна лицензиялааһыҥҥа салаатын начаалынньыгын эбээһинэһин толорооччу Георгий Игнатьев иһитиннэрбитинэн, ОРВИ-нан уонна грипп ыарыынан ыалдьыы намтаабат. 
Алтынньы 30 күнүттэн сэтинньи 7 күнүгэр диэри куруһуоктар, секциялар, эбии дьарыктар уонна тэрээһиннэр тохтууллар. 
Оскуолаларга дезинфекциялыыр сириэстибэлэрдээх убуоркалар, төрөппүттэри кытта сэрэтэр тэрээһиннэр ыытыллыахтара. Үрдүкү кылаастар очнай үөрэхтэрэ саҕаламмытынан оскуола иһигэр киириигэ температураны кээмэйдээһин, мааскалаах эрэсиим, уруок кэмигэр уонна быыһыгар үөрэнээччилэри арааран үөрэтии тутуһуллар. Очнай көрүҥүнэн үөрэнэр алын кылаас үөрэнээччилэрин ортотугар ыарыыны кэтээн көрүү хонтуруола салҕанар. 
Алтынньы 25-29 күннэригэр оскуолаҕа киириэн иннинээҕи тэрилтэлэргэ оҕо уһуйааннарыгар наадыйыыны кэтээн көрүөхтэрэ.  Ирдэнэр буоллаҕына бары санитарнай ирдэбиллэри тутуһан дьуһуурунай бөлөхтөр үлэлиэхтэрэ. 
Ил Дархан Айсен Николаев алтынньы 30 - сэтинньи 7 күннэригэр күһүҥҥү каникуллары тэрийэргэ сорудахтаабыта.