4 №-дээх коррекционнай оскуола саҥа дьиэтэ тутуллуоҕа

Дьокуускай куорат 143-с кыбаарталыгар, Пирогов уулуссатыгар 180 миэстэлээх 4 №-дээх анал (коррекционнай) оскуола саҥа дьиэтэ тутуллуоҕа. Үлэ саҕаламмытын туһунан СӨ Судаарыстыбаннай тутууга уонна дьиэ-уот хонтуруолугар управлениетын пресс-сулууспата иһитиннэрдэ.

«Бырайыакка олоҕуран, 4 966,46 кв. миэтэрэ иэннээх үс этээстээх саҥа дьиэҕэ үөрэнэр кылаастар, ону таһынан медицинскэй уонна психологическай кабинеттар, оонньуур хос, уһанар, иистэнэр мастарыскыайдар, 90 миэстэлээх остолобуой, сынньалаҥ зоналара, тупсаҕай оҥоһуулаах 144 миэстэлээх аактабай саала, спордунан дьарыктанарга, эрчиллэргэ анал саалалар, ЛФК саалата, медблок баар буолуохтара», – диэн бэлиэтээтэ управление салайааччытын бастакы солбуйааччы  Влад Пермяков.

Маны таһынан, саҥа оскуолаҕа кылаастар 25-30 оҕоҕо буолбакка, 12 уонна 6 оҕоҕо аналлаах буолуохтара.

Эбийиэк СӨ Бырабыыталыстыбатын уонна «ПроШкола» ХЭТ икки ардыларыгар түһэрсиллибит концессионнай сөбүлэһии чэрчитинэн тутуллуоҕа. Үлэ 2023 сыл бүтүүтэ түмүктэнэрэ былааннанар.

Санатан эттэххэ, бу иннинэ 4 №-дээх коррекционнай оскуола хаарбах туруктаах дьиэтиттэн 25 №-дээх оскуола эбии дьиэтигэр көһөрүллүбүтэ. Чайковскай уул., 113, турар оҕо үөрэнэригэр сөбө суох дьиэ көтүрүллүбүтэ.