4 №-дээх коррекционнай оскуола көһөр

4 №-дээх анал коррекционнай оскуола 25 №-дээх оскуола эбии дьиэтигэр көһөрүллэр. Бу туһунан Үөрэх управлениета иһитиннэрэр.

Дьокуускай куорат прокуратурата иһитиннэрбитинэн, суукка исковай сайабылыанньа көрүллүбүтүн түмүгэр, прокуратура ирдэбиллэрэ толорулунна, Чайковскай уулуссатын 113 нүөмэрдээх дьиэтигэр үлэлии турбут 4 №-дээх анал коррекционнай оскуолаҕа үөрэх бобулунна.

Ол курдук, анал коррекционнай оскуола Яков Потапов уулуссатын 4а диэн аадырыһыгар турар 25 №-дээх оскуола эбии дьиэтигэр көһөр буолла. Санатан аастахха, 2019 сыллаахха 25 №-дээх оскуола үс мэндиэмэннээх саҥа дьиэтэ тутуллубута.

Бу урукку өттүгэр  «Сахагипрозем» тэрилтэ дьиэтэ өрөспүүбүлүкэ уонна куорат бүддьүөтүн суотугар атыылаһыллыбыта, «Главстрой» тэрилтэ күүһүнэн саҥалыы уларытан оҥоһуллубута.

Уопсайа 2 тыһыынча кв.миэтэрэ иэннээх дьиэҕэ аактабай саала, остолобуой, библиотека, таҥас ыйыыр сир, 12 үөрэнэр кабинет, алын кылаас үөрэнээччилэригэр гимнастическай саала уонна медицина хоһо баар.

«Бу дьиэ коррекционнай оскуолаҕа сөп түбэһэр – оҕо ахсаанынан, ураты усулуобуйалаах кабинеттарынан, ол иһигэр логопед хоһо эмиэ баар. Билигин 25 №-дээх оскуола кылаастара сүрүн дьиэҕэ көһөллөр. Онно тохсунньу ый бүтүөр диэри 4 №-дээх анал коррекционнай оскуола көһөр», – диэтэ үөрэх управлениетын начаалынньыга Алексей Семенов.