203 дьоҕус оройуоҥҥа саҥа оскуола аһылынна

Бүгүн, билии Күнүгэр, 203 дьоҕус оройуоҥҥа «Центр глобального образования» гимназия үөрүүлээх быһыыга-майгыга аһылынна. Манна 35 кылааска 1200 оҕо үөрэниэҕэ. Ол туһунан Уокуруктааҕы дьаһалта пресс-сулууспата иһитиннэрдэ.
Үс сыл иһигэр РФ үөрэҕириигэ Министиэристибэтин уонна «ВЭБ.РФ» судаарыстыбаннай корпорация салаатынан Дьокуускай куорат территориятыгар саҥа 5 оскуола тутуллара былааннанар. Ол туһунан гимназия үөрүүлээх аһыллыытыгар СӨ Ил Дархана Айсен Николаев эттэ. 
Саҥа оскуола аныгылыы химия, физика, үлэ кэбиниэттэринэн толору хааччыллыбыт. Гимназияҕа доруобуйаларын туругунан хааччахтаах оҕолорго анаан бары усулуобуйа оҥоһуллубут, ол курдук үөһээ таһаарар механизмнар, Брайль шрифтээх суоллар уонна былааннар бэлэмнэммиттэр. 
Өрөспүүбүлүкэ Баһылыга Айсен Николаев киин куоракка сылын аайы үөрэнээччилэр ахсааннара эбиллэн иһэрин бэлиэтээтэ. 
«Федеральнай, өрөспүүбүлүкэтээҕи уонна муниципальнай былаастар ураты болҕомтону саҥа оскуолалар тутуллалларыгар, үөрэх тэрилтэлэрин өрөмүөннэригэр уураллар. Итинник миэрэлэр наадаларын президент Владимир Путин ыйбыта. Президент сорудаҕынан федеральнай уонна региональнай таһымнарга  ити сыалларга үбүлээһин көрүллүөҕэ. Биһиги өрөспүүбүлүкэ киин куоратыгар оскуола тиийбэт кыһалҕатын тэтимнээхтик быһаарар соруктаахпыт», – диэн бэлиэтээтэ  Айсен Николаев.
Куорат баһылыга Евгений Григорьев кэлэктииби саҥа үөрэх дьыла саҕаламмытынан эҕэрдэлээтэ уонна саҥа гимназия экология сүрүн кыһалҕаларын туһунан билиини биэриэҕэ диэн бэлиэтээтэ. 
«Үөрэх хаачыстыбатын тупсарар, үрдэтэр, оҕолорго саамай үчүгэйи биэрэр кыахтаммыппыт үөрдэр», – диир  Евгений Григорьев.
Үтүө үгэс быһыытынан саҥа оскуола дьиэтигэр алгыс сиэрэ-туома оҥоһулунна, ол кэннэ маҥнайгы чуораан чугдаарда.