2023 сылга Дьокуускай тиэргэннэрин өрөмүөнүгэр 450 мөлүйүөн солкуобай көрүлүннэ

«Ити улахан үбүлээһини, итиэннэ улаатыннарыллыбыт ассигнованиены киин куорат туһааннаах үлэтигэр муҥутуур таһаарыылаахтык туттуохха наада. Уулуссалар өрөмүөннэрин кэнниттэн бэрээдэктиэххэ, куораты ыраастааһын хаачыстыбатын, тупсаран оҥорууну уонна санитарнай туругун биллэрдик үрдэтиэххэ наада», - диэтэ Айсен Николаев.

Өрөспүүбүлүкэ үрдүнэн «Табыгастаах куорат эйгэтин оҥоруу» уонна «Уһук Илиҥҥэ 1000 тиэргэн» икки федеральнай бырагырааманан уопсайа 60 муниципалитекка 170-тан тахса тиэргэн уонна уопсастыбаннай туона тупсаран оҥоһулунна. Ити региоҥҥа уруккуга суох үрдүк таһым.

Ил Дархан тутуллар эбийиэктэр хаачыстыбаларыгар улахан болҕомто ууруллуохтааҕын бэлиэтээтэ.

«Тус хонтуруолу күүһүрдүү ирдэнэр, хас биирдии бырайыакка, кыра да балаһааккаҕа, тиэргэҥҥэ техническэй хонтуруол булгуччу баар буолуохтаах», - диэтэ Айсен Николаев, бырабыыталыстыба чилиэннэригэр уонна муниципалитет баһылыктарыгар туһаайан.