2022 с. булт болдьоҕун туһунан өссө биирдэ!

Быйылгы булт кэмин болдьоҕо Өрөспүүбүлүкэ баһылыга Айсен Николаев  2021 сыл муус устар 1 күнүнээҕи ыйааҕынан бигэргэтиллэн турар. Болдьоҕу быһаарыыга муниципальнай оройуоннар уонна өрөспүүбүлүкэ научнай тэрилтэлэрин сэбиэттэрин этиилэрэ учуоттаммыт.

Анды

Быйылгы сылга андыны бултааһын ыам ыйын 29 күнүттэн бэс ыйын 4 күнүгэр диэри ыытыллар, уопсайа түөрт күн. Ааспыт сылга диэри бултааһын болдьоҕо бэс ыйын 1-4 күннэригэр этэ.

Тайах

Тайаҕы бултааһын болдьоҕо балаҕан ыйын 15 күнүттэн ахсынньы 25 күнүгэр диэри салҕанар, урут алтынньы 1 күнүттэн ахсынньы 15 күнүгэр диэри көҥүллэнэр буолара.

Хагдаҥ эһэ

Тыатааҕыны күһүн – атырдьах ыйын 1 күнүттэн ахсынньы 31 күнүгэр диэри бултааһын болдьоҕо уһаабыт. Ол да буоллар, быраабыла быһыытынан, биир сылтан итэҕэһэ суох саастаах, быйылгы саҥа төрөөбүт эһэни бултааһын бобулларын бэлиэтиибит. Сааскы бултааһын муус устар 20 күнүттэн бэс ыйын 10 күнүгэр диэри бигэргэтиллибит.

Кыыл таба

Дьиикэй хотугу табаны бултааһын атырдьах ыйын 1 күнүттэн кэлэр сыл тохсунньу 31 күнүгэр диэри көҥүллэнэр.

Туртас

Улахан атыыр туртаһы бултааһын болдьоҕо атырдьах ыйын 20 күнүттэн балаҕан ыйын 20 күнүгэр диэри көҥүллэнэр.