2021-2022 үөрэх дьылыгар Саха сиригэр 986 целевой миэстэ тигистэ

2021-2022 үөрэх дьылыгар өрөспүүбүлүкэҕэ баар үрдүк үөрэх кыһаларыгар 986 целевой миэстэ Саха сиригэр бэриллэр буолла. 
Бэс ыйын 11 күнүнээҕи СӨ үөрэҕириигэ уонна наукаҕа министиэристибэтин оробуочай сүбэ-мунньаҕар федеральнай бүдьдьүөт миэстэлэригэр үөрэнии тула кэпсэтии барда. Мунньахха өрөспүүбүлүкэ министиэристибэлэрин, биэдэмэстэбэлэрин бэрэстэбиитэллэрэ уонна регионнааҕы үрдүк үөрэх кыһаларын туттарсар хамыыһыйалара кытыннылар. 

2021 сылга бүдьдьүөт миэстэлэригэр квота, целевой үөрэхтээһин уонна үөрэххэ туттарсар хамыыһыйалар үлэлэрин тэрийии туһунан информацияны миниистири бастакы солбуйааччы Михаил Присяжнай иһитиннэрдэ. Кини эппитинэн, бэс ыйын 14 күнүттэн АГИКИ, бэс ыйын 15 күнүттэн АГАТУ, бэс ыйын 20 күнүттэн өрөспүүбүлүкэ бары үөрэхтэрин кыһаларын туттарсар хамыыһыйалара үлэлиэхтэрэ. 
Сүбэ-мунньах түмүгүнэн, балаҕан ыйын 1 күнүгэр диэри 2021-2022 үөрэх дьылыгар үрдүк үөрэх кыһалара федеральнай бүдьдьүөт миэстэлэрин хайдах үлэҕэ киллэрбиттэрин анаалыстыырга быһаарыы ылылынна. 
Үрдүк үөрэх кыһаларыгар үөрэххэ бүддьүөт миэстэлэригэр целевой квотанан киирэр абитуриеннарга анаан туспа алгоритмы оҥороллоругар, оттон Саха сирин судаарыстыбаннай былааһын ситэриилээх уорганнарыгар абитуриеннары уонна үлэнэн хааччыйааччылары кытта целевой үөрэхтээһин туһунан дуогабар түһэрсэллэригэр сорудах бэрилиннэ.