2 №-дээх оскуола таһыгар учаастагы бэлэмнээһин саҕаланна

Киин куорат дьаһалтатын пресс-сулууспата иһитиннэрбитинэн, 2 №-дээх Национальнай политехническай орто оскуола таһынааҕы учаастагы тутууга бэлэмнээһин саҕаланна. 
Оскуола аттынааҕы учаастагы бэлэмнээн баран, эбии тутуу эбэтэр сүрүн куорпуска самалык оҥоһуллара былааннанар.  

«Якутдорстрой» АУо информациятынан, бэҕэһээ учаастактан тутуу бөҕүн тиэйии саҕаламмыт. Манна погрузчик, түөрт КамАЗ массыына, түөрт оробуочай үлэлээбиттэр. Бу кэнниттэн кумаҕынан кутуохтара уонна учаастагы былааннааһын ыытыллыаҕа. Хайа кумаҕын Хатыҥ-Үрэхтээҕи карьертан аҕалаллар. 
«Билигин бөҕү таһабыт, салгыы төһөнү үлэлиирбитин уонна болдьоҕун быһаарыахпыт. Икки күнтэн итэҕэс буолбат, үлэтэ элбэх», – диир «Якутдорстрой» АУо кылаабынай инженерэ Александр Оданец.
Оскуола салалтата эппитинэн, таһынааҕы сир учаастактарын мөккүөрэ быһаарыллыар уонна самалык тутуу оҥоһуллуор диэри балаһааккаҕа парковка буолар үһү. 
Быйыл кулун тутар ыйга СӨ Баайга-дуолга уонна сир сыһыаннаһыыларыгар министиэристибэтэ 1051 кв. м иэннээх сири 2 №-дээх Национальнай политехническай орто оскуолаҕа бастайааннай (болдьоҕо суох) туһаныыга биэрбитэ.