17-с кыбаарталтан «СПОРТИВНАЙ» түөлбэ бастаан кимнээх көһөллөрө чуолкайдана илик

Өрөспүүбүлүкэтээҕи ипотечнай агентство (РИА) Бырайыактары олоххо киллэриигэ управлениетын салайааччытын э.т. Мария Садовникова уонна Дьокуускай куорат Олох-дьаһах сыһыаннаһыыларыгар департаменын начаалынньыгын солбуйааччы Вадим Семенов Арассыыйа-Саха араадьыйа ханаалыгар кэпсээбиттэринэн, аҕыйах хонуктааҕыта киин куорат 17-с кыбаарталын олохтоохторун, Строительнай уокурук управатын бэрэстэбиитэллэрин уонна дьокутааттары кытта саҥа тутуллуохтаах «Строительнай» дьоҕус оройуон тула көрсүһүүнү тэрийбиттэр.
Көрсүһүү кыттыылаахтарыгар «Спортивнай» түөлбэҕэ аата да этэрин курдук спорт балаһааккалара, элбэх функциялаах спорт комплекса, бэлисипиэттиир суол, маны сэргэ доруобуйаны чэбдигирдэр искибиэрдэр, оҕо оонньуур балаһааккалара, оннооҕор ыты күүлэйдэтэр анал миэстэлэр баар буолуохтарын билиһиннэрбиттэр. Маны сэргэ «Спортивнай» олохтоохторо бөхтөрүн наардаан тоҕор буолуохтара. Оройуоҥҥа уопсайа 50 элбэх кыбартыыралаах олорор дьиэ, 1100 миэстэлээх оскуола, 240 миэстэлээх оҕо саада о.д.а. социальнай эбийиэктэр былааннаналлар.
Бүгүҥҥү күҥҥэ 17-с кыбаартал ханнык дьиэлэрин олохтоохторо саҥа оройуоҥҥа олохсуйаллара чуолкайдана илик. Урутаан эттэххэ, көһөрүү «2б» кыбаарталтан саҕаланыаҕа дииллэр. Бырайыак уопсайа 10 сылы быһа олоххо киирэрэ сабаҕаланар. Онон бу оройуоҥҥа олохсуйуон баҕалаахтары РИА @szria телеграм-ханаалын иһитиннэриилэрин кэтииргэ ыҥыраллар. 
Ааспыт сыл ахсынньы ыйыгар «Өрөспүүбүлүкэтээҕи ипотечнай агентство» генеральнай дириэктэрэ Владимир Трегубов «Киин куорат» хаһыакка биэрбит интервьютугар «тутуу барар сирин биир кэлимник сайыннарарга, олорор дьиэни сэргэ социальнай эбийиэктэри тутарга, сынньалаҥ сирдэрин тэрийэргэ, итии-тымныы уу ситимин тардарга судаарыстыба өттүттэн көмө оҥоһуллуоҕа. Ол курдук, СОПФ ДОМ.РФ  нөҥүө федеральнай үбүлээһин киирэрин ситиһиэхтээхпит» диэн турар.
Биллэрин курдук, 17-с кыбаартал аэропортан чугаһынан, манна элбэх мэндиэмэннээх дьиэлэри тутары сокуон көҥүллээбэт. Онон 17-с, 2-с, 4-с кыбаарталлары хабар саҥа «Спортивнай» түөлбэ дьиэлэрэ орто этээстээх буолаллара сабаҕаланар.