16-с кыбаарталга өрөмүөн үлэтэ

Строительнай уокурукка элбэх кыбартыыралаах дьиэлэр тастарын, онно киирэр сирдэри өрөмүөннүөхтэрэ. Ол курдук, 16-с кыбаартал Рыдзинскай уул., 18/4, 18/7, 18/8 үлэ барыаҕа. Маныаха куорат бүддьүөтүттэн 298 633 солкуобай көрүллүбүт.

“Дьокуускай уокуруктарыгар уонна куорат таһынааҕы бөһүөлэктэргэ бырагыраама толоруллуутун туһунан иһитиннэрии тиэрдиллибитэ. Олохтоох салалта уорганнара реестргэ бастакы киириэхтээх эбийиэктэр испииһэктэрин  куорат хаһаайыстыбатын үлэлэтэр Сулууспаҕа биэрбит буолуохтаахтар”,  – диэтэ дириэктэри солбуйааччы Татьяна Павлюковская.

Суол сорох сирдэригэр асфальт үөһээҥҥи дьапталҕалара алдьаммытын чөлүгэр түһэриигэ болҕомто ууруллар. Онно куорат бүддьүөтүттэн 2 мөлүйүөн 855 тыһыынча көрүллүбүт.  Ол курдук, Бурнашов уулуссатыттан Жорницкай уул., 7/10 диэри учаастак хабыллыаҕа.

“Рыдзинскай уонна Бурнашов уулуссатын учаастагын грейдеринэн тэҥнээтилэр. Күһүҥҥэ диэри үлэ тохтообокко барыаҕа. Кыбаартал иһинээҕи суоллар дьаамаларын өрөмүөннүөхпүт,  – диэтэ Строительнай уокурук Управлениетын салайааччыта Савва Михайлов.

Үп-харчы “2020 сылга “Дьокуускай куорат” куораттааҕы уокурук ОДьКХ-тын үлэлэтии уонна сайыннарыы” муниципальнай бырагырааматтан көрүлүннэ.