12 саҥа оскуола тутуллуоҕа

Дьокуускайга 12 саҥа оскуола тутуллуоҕа. Оскуолалар бары судаарыстыбаннай уонна чааһынай партнерство бырагырааматынан үбүлэниэхтэрэ.

Ол курдук, Пирогов уулуссатыгар, Сэргэлээх шоссетыгар, Олег Кошевой уулуссатыгар, 153-с кыбаарталга (ДСК), Хатаска, Чайковскай уулуссатыгар, Новопортовской уулуссатыгар, Билибин уулуссатыгар, Табаҕаҕа, Маҕанныыр суолга, «Севернай» оройуоҥҥа, Тулагыга саҥа оскуолулар тутуллуохтара. Ону таһынан 12-с, 5-с, 26-с, 29-с уонна Хатастааҕы оскуолалары кэҥэтиэхтэрэ.

Баҕалаах оҕо ахсааныгар миэстэ тиийбэт кыһалҕата быйыл ордук сытыытык турбут 17-с оскуолаҕа сыһыары тутууну оҥорор туһунан боппуруос көрүллэр. "Прометей" микрооройуоҥҥа эмиэ тыһыынча оҕону батарар оскуола тутуллан эрэр.

2026 сылга диэри, былаан быһыытынан, Дьокуускайга 15 тыһыынча саҥа үөрэх миэстэтэ тахсыахтаах.