12 кубоктан уонун сахалар ыллылар

“Кавказ кубога” кыһыл көмүстүҥү килбэчигэс хотойдонон, хайаланан  12 оҥоһуллубутуттан  уонун сахалар өрөспүүбүлүкэлэригэр илдьэ кэллилэр.  
Итинник ааттаах Бүтүн Арассыыйатааҕы түһүлгэ Ставрополь куоракка мас-рестлиҥҥэ ыытылынна. Манна бастакы–иккис миэстэҕэ тахсыбыттар Арассыыйа чемпионатыгар кыттар быраабы ыллылар. Онуоха эр дьоҥҥо ыйааһыҥҥа барытыгар сахалар иннилэрин биэрбэтилэр:
Владимир Баишев (60 кг), Тимофей Большаков (70 кг), Станислав Андросов (80 кг), Дмитрий Макеев (90 кг), Федор Федоров (90 кг), Юрий Михайлов (125 кг), Айсен Стручков (125-тэн үөһэ кг).
Кэрэ аҥаардарга чемпионнаатылар: Татьяна Дьячковская (55 кг), Сардаана Андреева (65 кг) Виктория Хорваткханова (85-тэн үөһэ кг). Икки кубогы  Илона Шапка (75 кг), Зита Кодзоева (85 кг) Хотугу Осетияҕа—Аланияҕа илдьэ бардылар. Дария Габышева (75 кг) уонна Ленинград уобалаһыттан Марианна Иванова (85-тэн үөһэ кг) Арассыыйа чемпионатыгар кыттар быраабы ыллылар.  Сайыына Павлова (85 кг) боруонсаҕа тэбиллэн, бэрт кыранан тиийбэккэ хаалла.
 Миэстэлэспиттэр ортолоругар Ставрополь кыраайын, Кабардино-Балкария өрөспүүбүлүкэтин, Москва уобалаһын мас-рестлердэрэ бааллар.